2020年08月14日 
2019-09-06


中年危機解密 李思捷


現年45歲的李思捷,人到中年,無論在工作、健康甚至感情,都感到響起了人生危機警號!他坦認開始思考對生活上的態度,價值觀亦因此起了很大的轉變。而一向予人是Playboy的李思捷,更直言:「玩一世『好Q悶』,都想搵個我愛同愛我嘅人與子偕老,不過婚姻呢樣嘢真係要好小心去處理,唔想離婚收場,真係要好啱Timing同性格先會結。」看來無腳的雀仔也想落地生根了!

撰文:劉寶如|攝影:陸羽勝|場地提供:桔梗

暫別無綫3年,李思捷再度回巢,夥拍田蕊妮(阿田)曹永廉(阿廉)拍劇,於新劇《她她她的少女時代》再次與觀眾見面。思捷表示當知道能跟阿田及阿廉這兩位做拍檔,就知道必能擦出火花,肯定非常好玩,他不諱言:「如果只係得我一個人演,肯定唔好睇,但係3個人合併,就可以令到成套劇升華,可以更加立體。」
學懂分配時間
3人在《她》中演活中年危機的一群,講述他們人到中年,如何互相扶持,重新爬起來的勵志故事!思捷飾演一個20年前擁有輝煌成就的樂隊主唱,經歷一些波折後,人到中年最後一事無成,「佢並唔係啲咩善男信女,某件事情發生咗之後,佢坐咗好多年監。放監之後,佢走晒樣啦,變咗一個成日叫雞,冇乜前途嘅中坑。呢個時候遇到同樣身陷中年危機嘅阿田同曹永廉。3個又點樣可以爬番起身呢?」

思捷對劇中角色感同身受,皆因自己也經歷着中年人的煩惱。事實上,一向樂觀自在的他,年紀漸大,這幾年也不禁多了不少擔憂,會擔心冇人搵自己拍戲、健康問題,更考慮到是否要進入人生另一階段,結婚擁有屬於自己的家庭。因此思捷開始改變自己的生活習慣,人生的價值觀也有很大的轉變,「以前就工作第一,要個名出嚟,想多啲人認識我。但其實呢啲都係廢話嚟嘅,一啲都唔重要!依家我接咗工作,會做好場戲,盡力做完就算啦,返到屋企我會Take Care我嘅屋企人,陪媽咪做治療,亦都會抽啲時間,畀自己空間,會飛去日本一個禮拜同朋友玩。」更語重心長指人大了,想法更成熟,懂得分配時間給工作、家人和自己。
被父母狂催婚
出名花弗的思捷,原來婚姻對於他來說亦是中年危機裏的一環,他直言玩一世「好Q悶」,「都想搵一個我愛同愛我嘅人,與子偕老。」他更透露父母對其終身大事感到心急,「我阿爸阿媽直情講出口問我幾時結婚,但係婚姻呢樣嘢真係要好小心去處理,唔好因為父母催婚而夾硬去達成佢哋嘅期望,如果因為呢樣嘢而結婚,最尾離婚會傷害好多人,傷害埋自己,所以一定要好肯定個Timing同性格,先至去結婚。」
而奉行生活簡簡單單的他,在工作上卻追求難度!思捷近年較多專注在幕後工作,好似去年自導自演的賀歲片《一家大晒》,對製作可謂有重質不重量的執着,「我鍾意好似砌Lego咁做一部戲,自己做幕後,所有嘢自己砌出嚟,最尾件事係得嘅,成功感會好強。製作一定要搵到啱自己嘅劇本,夾硬開套戲其實唔好睇,一定要搵到個好嘅故事,我就奉行『唔好為開戲而開戲,而係為一個好嘅故事而開戲。』」
談及成功感,思捷最感到驕傲的,就是家喻戶曉的幽默訪談節目《今晚睇李》,他形容,這個節目算是他人生旅程上的一個亮點,「喺星期日10:30呢個冇人睇電視嘅時段,竟然有咁高嘅收市,可以扭轉呢樣嘢真係好難得。」被問及會否打算再創「人生高峰」時,他坦言公司有自己的想法,還是順其自然的好。