2020年08月8日 
2019-08-19


中環八羽茶室 「大孖沙」現身建制集會惹熱議 地產商歸邊仲要打埋卡?


喺啱啱過去嘅星期六,一直「撐警」嘅建制派團體,再喺添馬公園舉行集會,主題為「反暴力 救香港」。熟悉嘅親中人物出席固然非常合理,不過亦有一班政治活動稀客出現噃,佢哋就係本港多間龍頭地產商嘅「揸弗人」及「繼任人」。唔知係咪月初有黨媒逐間本港地產商點名批評,所以一班身家百億千億嘅富豪,要急急腳出嚟表態?
從事地產行業嘅偉哥話,上星期六喺添馬公園舉行嘅「反暴力 救香港」集會,除咗有大量嚟自本地及北方嘅「愛國愛港」人士出席外,亦有唔少「大孖沙」嘅蹤影,包括九倉首席顧問吳光正同埋阿仔吳宗權、信和主席黃志祥同公子黃永光、新地執行董事郭基煇、遠東發展主席邱達昌、新世界執行董事蘇仲強及薛南海,同埋地產建設商會主席及會德豐地產主席梁志堅等等。偉哥話,呢班「大孖沙」過去甚少公開出席呢啲政治活動,極其量都係透過商會發表聯署聲明,究竟有乜嘢驅使佢哋出席集會呢?係愛吖,定係壓力呢?
熱衷於社運嘅公關Damon就認為,原本「送中條例」最驚嘅唔係升斗市民,而係一班大商家,因為一旦條例通過,恐怕會引發外資大規模撤出,拖累股樓大瀉,加上「送中法」可以沒收被引渡人士嘅資產,首當其衝必然係一眾有錢佬。Damon話,回想番6月9日有一百萬人上街,林鄭依然堅決硬推修例,激發年輕一代喺6月12日衝擊立法會以阻止開會,先可以令條例修訂工作「暫緩」。睇番地產商今日咁「踴躍」表態,可見形勢有幾咁嚴峻!
「超人」發聲明最有型
縱橫商界幾十年嘅張總,就對呢班「大孖沙」不予置評,相反對「超人」李嘉誠讚不絕口。張總話誠哥一生充滿智慧,即使年過九十都仍然思維清晰,一早已經將長和王國生意遍及全球,令佢可以挺直腰板講嘢。張總仲話,誠哥日前喺各大報章頭版登報,其中一款寫上「黃台之瓜,何堪再摘」,係出自於唐朝李賢的絕命詩《黃台瓜辭》,勸告武則天唔好再對自己嘅兒女趕盡殺絕,呢番說話可以點樣應用於今日香港嘅局勢,相信唔駛多加解釋。
張總又提到,另一個版本亦被廣大傳媒報道過,大眾解讀成一首「藏尾詩」,因為每句尾字正正湊出「因果由國 容港治己 義憤民誠」,如何理解就見仁見智喇。張總坦言對誠哥嘅智慧拜服得五體投地,既可以表達愛港之心、拒絕暴力,但同時又得到抗爭者嘅擁戴,絕對係香港第一智慧老商家!

「中環八羽茶室」匯集一眾擅長收風的各界精英,與各位八盡財金界秘聞及新鮮滾熱辣話題!