2020年08月8日 
2019-04-29


中環八羽茶室 網傳空姐「倒酒」 回應員工當賊辦 國泰「捉鬼」惹報復?


「員工係最寶貴嘅資產」,對於老闆嚟講,呢句從來都係「知易行難」。因近年炒燶期油禍及業績而不斷諗計縮減開支增加收入嘅國泰航空(293),最近就發生咗一啲不愉快事件,影響咗管理層同前線員工嘅緊密合作關係。有幾位金融圈好友去完旅行返嚟,喺「八羽茶室」同大家吹水時,竟然唔係分享去咗邊度威,而係講到國泰突擊搜查空中服務員嘅隨身行李,搵到一啲食物同水,幾位員工隨時因為涉嫌偷竊而被「炒魷」!不過,據悉行動引起員工不滿,網上更流傳有空姐採取「倒酒」報復行動,若然屬實,呢單「關公災難」真係有排拆喇!
曾經喺「因航」做過空姐嘅高級秘書Mandy話,佢經常同班空姐喺WhatsApp群組聯絡,最近都聽到佢哋經常訴苦,覺得空姐愈來愈惡做,最近嘅例子就係將多架777型號客機改裝加位,搞到同一班機嘅人手更形短缺,一個服務員喺經濟艙隨時要服侍60個客,成程機忙起上嚟,莫講話醫肚,就連廁所都無得去。
Mandy仲話,當年做空姐,就係因為返工無固定食飯時間,最後捱出胃病。佢仲引述現役空姐講,明明啲多咗嘅牛角包、牛奶、乳酪都會當係廚餘咁倒咗去,佢哋諗住拎落機休息嘅時候食,就隨時搞到冇咗份工,又要當佢哋係賊咁突擊搜查行李,呢吓實在係空姐爆發嘅臨界點。
做足成程機冇嘢食
Mandy仲收到疑似國泰前同事影咗嘅相,聲稱有Crew為咗抗議公司,就將機上嘅紅酒白酒開晒,歡迎客人添飲,呼籲大家「以後如果坐 CX記得飲多啲」,反正公司情願浪費都唔會「益」員工,啲客飲唔晒咪「倒晒佢囉」!
呢個時候,一向擅長公司管治嘅張總就埋嚟搭嗲,佢話國泰班高層諗嘢「膠膠哋」,自己多年嚟炒燶期油,累積蝕足幾百億就濕濕碎,唔使問責仲可以收巨額花紅;反而前線空姐工作量愈來愈多,只係拎啲公司都會當垃圾揼嘅麵包同飲品,就搜袋「要拉要炒」,難免會惹起反彈囉。張總仲話,一間有良好管治嘅公司,應該善待員工,視為重要資產,有啲嘢側側膊咪算囉,雖然牛角包都係公司資產,但班高層又有冇諗過,班空姐空少其實做足成程機,都無嘢落肚呢?

中環八羽茶室
「中環八羽茶室」匯集一眾擅長收風的各界精英,與各位八盡財金界秘聞及新鮮滾熱辣話題!