2020年08月6日 
2019-10-11


主子萬歲


生命中有毛孩闖入,或許為你帶來意想不到的驚喜與幸福。自從江若琳養了英國短毛貓「糯米糍」後,便啟發了她與幾個貓奴一齊追尋夢想,開設一家讓主子住得舒適的酒店,開業短短半年就讓她獲得滿足感。更讓江若琳感受到自己似乎與貓咪們一同成長一同進步。

撰文:劉寶如|拍攝:陸羽勝|場地提供:貓季酒店

看到街上如此多被棄養的貓狗和流浪街頭的動物,江若琳(Elanne) 每每都感到心痛,所以其開設的貓酒店會協助一些有需要的動物團體,「我哋好欣賞一啲帶領養貓貓上嚟住嘅主人,自己同其他合夥人喺空閒嘅時候都會做好多貓義工嘅工作。之前聖誕節嗰陣,我哋貓酒店就搞咗個小型嘅Party,叫大家唔好買禮物,盡量買物資上嘅嘢幫助有需要嘅貓貓。」
樂而忘返
到底是甚麼觸發Elanne要開一家貓酒店呢?她表示,有很多養貓的朋友和她交流貓經時分享,自從養了貓後便沒有去過旅行,因為不放心自己的貓貓單獨在家,索性就不旅行了,「自己都感同身受,一出遠門就會擔心屋企隻貓係咪食得好,就算買咗餵食機都怕部機會壞,所以忽發奇想,以自身嘅體會開間好似家一樣嘅貓酒店。 」
一臉幸福的Elanne說貓酒店雖只經營了半年,卻有很大滿足感!這種滿足感源於每隻來住的貓,都像住在自己的家一樣優遊自在,甚至牠們被接回家時,毛孩會發主人脾氣,賴在房間裏不願走,讓人哭笑不得!經營酒店除了和貓貓們建立一段感情外,也遇上窩心的小故事。Elanne憶述有隻叫鼻鼻的貓,住了一個禮拜也沒有人領牠回家,打電話才知道原來主人的媽媽不讓她養,一旦把牠帶回去就會將牠送走。與鼻鼻相處後,有了一個禮拜的感情,於是Elanne作出了一個重要的決定,「我唔想見到佢返去之後無家可歸,咁我就話『你擺低畀我哋啦。』之後鼻鼻就好似店長咁,守護呢間貓酒店,後尾我哋嘅其中一個拍檔就帶咗佢返屋企,依家佢係一隻超級幸福嘅貓貓。」
老公呷醋
另一半給予無限量支持,能讓Elanne安心追夢,老公「生煎包王子」蕭潤邦一句:「呢個係你哋4個女仔嘅夢想,妳哋放心去搞啦!」令她無後顧之憂。而在做生意上經驗豐富的蕭潤邦更不時給予意見,使Elanne在經營貓酒店時,事半功倍,走少好多寃枉路!
自從養了糯米糍後,江若琳每次工作完都會趕回家陪貓貓,為的是能在有限的時間裏與牠相處。「老公喺屋企地位不保,養咗糯米糍之後,老公都有同我投訴話少咗陪佢出去食飯唱K。」被問到是否專心工作不生小孩時,她答道,一直以來都有計劃生孩子,但都是順其自然,「呢啲都係緣分嚟嘅,同埋都驚隻貓會呷醋,所以我不時會喺佢耳邊講『第時要錫啲細佬妹啊,第時唔可以抓人㗎,佢哋仲會同你瞓覺。』我覺得佢係聽得明嘅。」