2020年08月14日 
2019-05-03


乘風破浪 黃美棋


「#經得起風浪先食得起大茶飯」,這是台式餐廳「大茶飯」的Slogan,亦是老闆娘黃美棋與一班股東的座右銘。6歲開始拍劇的黃美棋早年遠赴美國留學,回流後便重踏電視圈延續演藝夢,看似平步青雲,但實際卻經歷了不少小風波,「當年香港電視開唔到台,對我嚟講係一個風浪,之後嘅路要點行呢?好多人可能會選擇棄船,但我好鍾意演戲,好想堅持,雖然嗰時好多客搵我做Event,但我問自己係咪想做KOL?唔係!我係想做一個演員!」認清目標後,黃美棋向着標竿發奮狂追,終於在前年簽約無綫做主持又拍劇,上月更進軍飲食界,一圓兒時夢想。

撰文:黎寶倫|攝影:黃飛文

「我鍾意做藝人,因為由細到大都做緊,加上挑戰同滿足感好大,但我明白做藝人壽命唔長,一定要有一個副業去Support你,所以我就揀咗自己好鍾意嘅飲食。」黃美棋(美棋BB)說,於是今年4月,她與5名於美國讀書認識的好友合資7位數,於將軍澳中心開設的台式餐廳「大茶飯」亦正式開張。
出錢出力
8月就踏入30歲的美棋BB向來是「慳錢一族」,記得她說過為了慳得一蚊得一蚊,跟男友鍾健威(Ray)拍拖仲會校鬧鐘睇早場,如今居然捨得大灑金錢開食肆,實在難以置信!確實,美棋BB也坦言從荷包掏錢出來一刻很肉痛,不過能夠完成Bucket List中的一項,她亦甘願放手一搏,「做飲食係我由細到大嘅目標,因為我好鍾意食嘢、煮嘢食,一路都有諗好多計劃,直到去年拍檔Kenny問我有冇興趣一齊搞飲食,其他股東又係美國讀書嘅朋友,既然大家Concept都咁啱嘅時候,我覺得呢個投資都可以試吓,叫做喺30歲前完成咗人生一件好重要嘅事。」
結果開業數天已非常旺場,令他們喜出望外。凡事親力親為的美棋BB更與一班員工齊上齊落,連踩4日,「我希望盡量學識晒佢哋嘅嘢,而唔係淨係企喺度收銀!落單、上菜、斟水、抹枱我都會做,我都唔希望啲員工覺得好大壓力,見到我成日喺度睇住佢哋咁,希望大家知道我哋係坐緊同一條船。」
養生秘方
與此同時,亦喚醒了美棋BB於大學時期在美國一間中菜館打工的回憶,「嗰時負責落單、收銀、聽電話,我覺得有啲嘢係冥冥中安排好,你永遠唔知10年前做過、學過嘅嘢幾時有用,好感恩10年後我終於叫做擁有一間餐廳,就好似我哋其中一個麵叫『17歲的麵』帶出嘅Message,希望大家追逐自己嘅夢想,無論時間幾耐都唔緊要,只要堅持、唔好放棄,總有一日會做到。」
說起店內的菜式,她又強調餐廳堅持採用新鮮、無添加的食材,務求讓顧客食得健康又安心。又難怪的,事關私下的美棋BB雖然天生童顏,但已十足婆仔般養生,平日不但戒凍飲,更將「健康瘦身黑豆茶」當水飲,「黑豆嘅排水作用比紅豆更強,所以我哋都擺咗落Menu。」說到此際,相信女士們都很好奇她是怎樣收身不瘦胸?她即大方分享:「媽咪Keep住都會煲魚湯畀我飲,點解有幫助呢?因為通常啲太太生完BB要谷奶,咁魚湯就幫到佢哋。」語畢,又立刻向大家推介自家的零味精「番茄魚湯」,絕不錯過任何Hard Sell機會。
跟得男友
雖然身材Fit到漏,但美棋BB卻非常為食,因此她亦特別愛烹飪,最拿手的菜式則是鹽酥雞,而煲湯、小炒、西餐等都一律難不倒她,「媽咪係我第一個師傅,佢煮嘢好好食,所以我都成日喺廚房偷望,學學埋埋好多嘢;直到去美國讀書,冇人煮嘢我食就自己下廚,開始整甜品、菠蘿包……我個Roommate就整滷肉飯、紅燒牛肉麵、鹽酥雞,咁我就全程喺隔籬偷師。」
看來已準備好做人妻了吧?「係嘅,如果齋睇廚藝方面,應該唔會餓親老公。其實我哋都有傾過結婚,但唔會係呢一、兩年,因為雙方喺工作上都有新安排,我唔想貿貿然放低,等大家嘅事業更上一層樓先諗啦。」至於結婚基金,她笑言靠Ray了,自己則繼續儲錢開分店,或許屆時再叫男友入股一齊玩,「今次佢幫咗我好多,譬如開幕幫我做MC,又喺門口幫我招呼客、講解吓,連踩咗4日,頭嗰幾日真係可以用打仗嚟形容,我都叫啲大股東出番糧畀佢,但Ray話唔使,都係幫我手,所以佢係非常之好。」


大茶飯
地址:將軍澳唐德街9號將軍澳中心1樓137B號舖
電話:2350 1628
營業時間:星期一至日11:00 - 22:00