2020年08月14日 
2019-09-27


何文俊##發展商捐地#政治定善事?


Prof J:因應「反送中」而引發嘅社會動盪已經超過110日,但睇嚟仍然未有降溫迹象,事件仲升級為外交議題,美國更好大機會通過《香港人權與民主法案》,以保障香港人權,為香港爭取民主選舉,亦同時為中美貿易戰增加議價籌碼。
仲尼:不過比較無奈嘅係,無論中國及香港官方,都依然將民怨歸咎於住宅供應不足,市民難以上車,而逃避回應港人嘅強烈民主訴求。
Prof J:為咗配合呢個主旋律,原本有個非常支持政府填海造地、今年初曾經喺立法會否決動用《收回土地條例》嘅建制大黨,忽然賣晒報紙頭版廣告,又開記者會要求政府引用該條例,以收回私人業主嘅閒置土地大量興建公營房屋,轉軚之快,真係令人嘆為觀止。
仲尼:更令人嘆為觀止嘅,係呢個建議光速獲得官方及地產商回應。首先係該政黨話咁快就同政府召開會議,對於簡化搵地、規劃、收地程序達成共識,又指政府願意多利用該條例收地,可謂再一次「成功爭取」;而一向搵錢至上嘅地產建設商會,仲話唔反對當局引用《收回土地條例》,最緊要協助解決民生問題,救市民於燃眉之急咁話。你話神奇唔神奇?
Prof J:最新鮮滾熱辣嘅消息,就係一向最識時務嘅新世界發展(017),喺業績記者會宣布捐出價值34億嘅300萬呎農地,以興建公屋及發展社會房屋,配合晒中央就「市民怨氣只因缺乏住宅供應」嘅定調,為港府「解憂解困」喇。
仲尼:其實發展商捐地唔係乜嘢新穎創舉,例如恒基地產(012)都曾經捐地興建安老院舍、青年宿舍同埋過渡性房屋,不過今次新世界嘅捐地時機,就反映佢哋有幾咁緊貼中央及港府政策喇。由於喺「反送中」風波爆發後,有傳中央希望加強對本港企業嘅控制,你見新地引入國企前黨委書記入董事局就可見一斑啦,而新世界喺呢個時候主動「投誠」慷慨捐地,不但為港府增加建屋籌碼,主動為中央「解憂解困」,亦可藉着犧牲公司小部分利益,減輕中央加強控制嘅潛在壓力,可謂一舉兩得!不過亦有分析指出,今次可能係本地財閥被「分身家」嘅第一步,未來恐怕會陸續有來!
Prof J:不過我哋嘅首富李嘉誠先生,睇嚟就未必咁諗喎!
仲尼:自從李嘉誠先生喺慈山寺講過,希望執政者對未來主人翁「網開一面」後,就忽然出現大量針對佢嘅言論,當中唔少係嚟自大陸官方背景傳媒,除咗翻舊帳話佢「囤地自肥」、「走資」外,亦有人批評佢唔似得其他地產商咁踴躍捐地。不過誠哥就繼續佢嘅笑罵由人本色,喺新世界宣布捐地後,仲出咗份新聞稿「潑冷水」,表明將農地發展為房屋需要時間,暗指此舉係遠水不能救近火,仲列出旗下李嘉誠基金會多年嚟喺中港兩地嘅捐款達到250億元,喺企硬自己立場嘅同時,亦提醒外界,自己絕非「一毛不拔」! 用十個字解釋,就係「政治歸政治,善事還善事」。
Prof J:學哥哥張國榮話齋,「笑罵由人,灑脫地做人!」真係要好似誠哥咁嘅Class先做到!

何文俊(仲尼)  
《都市日報》財經及地產版主管,於傳媒行業打拼十數年,不忘初心直言無諱,亦愛化繁為簡,將複雜的財經及地產資訊,以簡單的生活化詞彙告訴讀者

徐燦傑
人稱Prof J,大學財金系前教授,金融達人,娛樂.經濟學主理人,諗deal, 做deal成為咗生活嘅一部分!
(逢周五見報)