2020年12月1日 

何文俊##2019東方華爾街啟示錄

2019-01-04 (週五)

仲尼:兄弟,新年快樂!但係見到今年股市開頭咁「快落」,都真係幾難快樂!
Prof J:我見到呢個市都冇晒心機,不過你知道我不嬲買股票,都係只會買「乾身」嘅,正如我嘅名句話齋——貨已乾、等亮光!即使估唔中升浪,起碼都輸少當賺,心理上好過啲啦!
仲尼:咁2019年嘅股市,係咪會非常之難玩?
Prof J:2019年肯定受制於中美貿易戰呢場「乒乓大戰」,其實中美一來一回,都打咗好鬼死耐!雖然多咗個「90日嘅約定」,但我認為其實都只係字面上嘅安排!唔可以否認嘅係,美國自從金融海嘯之後,不斷靠印銀紙將自己嘅經濟由谷底救番上嚟,亦成為環球經濟重新振作嘅領航燈!但最無奈嘅係,冇一個國家可以幫佢接力,將呢個經濟復甦嘅概念延續,美國自己又不斷以極高成本將呢個經濟位置頂住,想搵人接火棒又唔易,恐怕最終都係爆破收場!
仲尼:你講講下,咁鬼似舊年一大堆上市嘅新經濟股同科網股咁嘅,即係將估值不斷推高,然後將火棒喺街上亂掉,睇吓邊個唔好彩接咗,就搞到滿身傷痕!
Prof J:講開去年上市嘅新股,都係得兩個方程式:一係就夾高、狂炒、散貨;冇心機嗰啲,就即刻向下炒、散貨之後就話之你死!完全欠缺咗以前精心鋪排嘅「大龍鳳」、「大製作」!
仲尼:嘩,你咁樣講,今年股市咪仲難玩囉,咁你有咩意見畀我先,話晒你都係前輩財演,你嘅建議,我實會聽吓㗎!
Prof J:衰仔,又玩我!下年個市,如果大家有時間,可以睇睇我偶像——劉德華先生監製嘅電視劇《東方華爾街》去得到啟示,喺劇裏面,主角之一嘅吳鎮宇講咗句經典說話——當全世界開始輸錢嘅時候,就係遊戲重新開始(Restart) !加上2019年被坊間稱為大審判年,第一日股市已經重新洗牌,所以都算危中有機!
仲尼:兄弟,萬一有咩異動,你記得通知我呀!
Prof J:你知我有乜嘢都通知你㗎啦,不過我都要通知支持咗我哋咁耐嘅廣大讀者,你知我唔鍾意By pass任何人㗎啦!總之,2019年,我哋黃金兩兄弟一起衝!

何文俊(仲尼)(逢周五見報)
《都市日報》財經主編,於傳媒行業打拼十數年,不忘初心直言無諱,亦愛化繁為簡,將複雜的財經及地產資訊,以簡單的生活化詞彙告訴讀者

徐燦傑
人稱Prof J,大學財金系前教授,金融達人,娛樂.經濟學主理人,諗deal, 做deal成為咗生活嘅一部份!