2021年01月21日 

何文俊##Pre-IPO的投資奧義

2019-10-25 (週五)

仲尼:兄弟,呢排個市,就好似星爺喺《少林足球》咁講──終於翻返嚟喇!你睇吓隻隻新股上市,都係有非常唔錯嘅回報!搞到本來諗住「冬眠」嘅我,最近都重投股市,希望搵番餐茶飲吓!
Prof J:我做咗個統計,最近上市嘅新股,首日升幅普遍比招股價高出起碼五成到八成,其中魯大師(3601)就係最好嘅例子,招股價$2.7,開始第一口價$4,最高曾經造過$11.16,而家都仍然有$5.56!即係話,如果入飛抽到上市,再揸到而家,以股神價值型投資嘅方法:買入並持有嘅話,帳面嘅回報已經係120%!都咪話唔犀利!
仲尼:係就係,但正如你話齋,一個唔好彩喺高位接咗火棒,就真係一殼眼淚啦!
Prof J:又唔可以咁講嘅,正如交易所、證監會同好多唔同嘅機構,都教我哋「投資涉及風險」,應該量力而為呀嘛!只要股票價格冇所謂嘅市場操控嘅話,其實投資者嘅得益或者損失,佢都係唔需要負責任!
仲尼:雖則如此,但係見到「人人賺錢,唯獨自己輸錢」,真係會有種食緊「黯然叉燒飯」嘅感覺囉。
Prof J:其實每一個投資者都唔想輸錢,但係市場風險係冇人可以完全避免,最多係點樣喺風險管理同埋回報上取得平衡,所以我而家開始都傾向投資一啲上市前期嘅公司,令自己嘅彈性同埋風險回報點捉得更準!
仲尼:正喎,講多啲嚟聽得唔得呀?
Prof J:其實上市前期嘅投資「可長可短」,以一間主板公司、需要三年營運數據作為基本上市要求為例,有基金喺第二年已經希望成為投資者,好處係估值比較低,回報亦比較高,但如果第二、第三年嘅財務數據唔達標,最終上市夢碎,咁風險其實都相當大㗎!
仲尼:兄弟,你講過㗎嘛,回報同風險係Twins嚟㗎嘛,邊驚得咁多呢?
Prof J:無錯,所以上市前期投資,都可以喺準備交A1表格之前嘅60日之內,成為佢哋嘅「策略投資者」!好處係「入得表」嘅時候,基本上所有財務資料,已經得到上市參與者,例如保薦人、會計師、律師核實同埋認證!俗語講句即係「好事近」!但當然回報就冇早在第二年成為投資者咁多啦!但係去到呢個階段,一般嘅「準上市公司」都會作出一啲承諾,假設最終未能成功上市,都會向投資者提供一個基本回報,即係所謂嘅「目標保底」回報喇!
仲尼:真係唔講唔知,原來投資都有咁多無窮無盡嘅學問!可見終身學習係非常重要!
Prof J:我自從做咗私募基金之後,睇嘅嘢同知道嘅嘢,係會用一個更加整體嘅層面去分析,無論上市又好、為企業推動融資去發展都好,作為私募基金,都可以提供好多空間,為企業打通「任督二脈」,為佢哋創造更多基本核心價值!
仲尼:所以,與其日日顧住炒賣股票,不如諗吓點樣將間好嘅公司投資落去,同公司一齊成長,利潤分享好過啦!
Prof J:你講得啱,自從香港資本市場經過一輪整頓之後,係時候回歸基本,以「企業帶動金融」重新出發!上市雖然係一個最普遍嘅方法,但所謂「條條大路通羅馬」,其實仲有好多方式為企業創造價值嘅!有機會再慢慢同你分享!

何文俊
(仲尼)  
《都市日報》財經及地產版主管,於傳媒行業打拼十數年,不忘初心直言無諱,亦愛化繁為簡,將複雜的財經及地產資訊,以簡單的生活化詞彙告訴讀者

徐燦傑
人稱Prof J,大學財金系前教授,金融達人,娛樂.經濟學主理人,諗deal, 做deal成為咗生活嘅一部分!