熱話 時尙 食玩 生活 旅遊 娛樂 親子 專欄 着數

堅持不懈 李雨陽

2019-11-01 (週五) 08:00 上午

曾參演無綫青春偶像劇《當四葉草碰上劍尖時》的演員李雨陽,近年淡出本地演藝圈,曾經歷失業導致生活拮据的他,最近在觀塘廣場新開小食店Cooking Mami,以親民價售賣泰菜和港式點心蒸飯,加上為避免與同行產生惡性競爭而花盡心思設計的菜單,吸引了不少街坊慕名而來。

採訪:黎寶倫|撰文:黃姿慧|攝影:陸羽勝

選址觀塘廣場,皆因這是李雨陽(Eddie)的成長地,「自己喺觀塘生活超過30年,對觀塘有份情意結,所以決定喺呢度開舖。」小食店由Eddie太太和兩位朋友打理,Eddie閒時亦會到店內幫忙,他笑稱自己對間舖最大的貢獻就是「包辦」一些厭惡性工作及擔當「招財貓」的位置,閒坐下來不時會被街坊認出,他也毫不介意說:「係呀,我之前拍電視劇㗎!」更會請街坊多多指教。
濃厚人情味
商場內有許多不同的小食店,為避免與同行產生惡性競爭,透過觀察及商量後,Eddie便與幾個夥伴一起研究推出一些商場內沒有售賣的特色小食,「香港人都好鐘意食泰式嘅食物,所以我哋就覺得可以加啲特別嘅泰式串燒,食材可能大家差唔多,但我哋可以加沙爹汁或者辣汁,兼顧埋一啲唔食辣嘅朋友。」除了泰式食物之外,店內亦有售賣貼合港人口味的點心,如牛肉球、鮮竹卷等,鮮竹卷會配上一個自家熬製的醬汁,以帶出鮮味,Eddie更笑言店內售賣的鮮竹卷與別不同之處,就是「多咗四葉草嘅味道」。
「其實開頭嗰個幾月我哋都試過有好多唔同嘅笑話,好多蝦碌嘅事情出現,例如糖、鹽撈亂咗,或者係味道重手咗甚至唔夠味道。」剛開始營業時難免會有出錯的地方,所幸同場其他店的朋友知道有新店開業都會前來嘗試,亦會大方給予意見作改善,例如:「今次咁樣其實都好食嘅,但我有個方法你會唔會想試吓?」Eddie覺得自己與其他店舖的關係猶如一個「大家庭」般,經常一起研究如何令產品做的更好,這也讓Eddie深深感受到觀塘帶來的濃厚人情味。
絕不言棄
Eddie離開無綫後,曾在2012年轉投香港電視,但因不獲政府發牌而出現工作危機,為求出路的Eddie於是與親戚合資到街市賣原味雞,生意做得不俗之餘更被網民稱作「雞佬」。但到了2015年Eddie開始投身內地市場,參演一些網絡電影、電視劇之後,留在香港的時間比較少,導致原味雞生意的業績開始滑落,無奈要將代理權交還原主,但Eddie仍然會致力幫忙於宣傳及代言的工作。
因工作關係而放棄原味雞的代理權之後,Eddie再次另覓新出路,「我太太差唔多時間,同啲識咗好耐、由細玩到大嘅朋友,大家因為都有咗各自嘅家庭,討論嘅話題變咗開始研究點樣整嘢食整得健康畀啲小朋友,開始交流廚房心得,大家就商量不如開間小食店啦,於是就有咗呢間Cooking Mami。」相比起過去賣雞的生意,Eddie直言「自己落手先覺得係辛苦嘅」,工作時間長、體力勞動多、店舖打烊之後清潔工作量大,幾乎要花費一個小時的時間才能完成,令Eddie深覺每一件事情都要經過接觸及了解之後才知道當中的「不容易」。但Eddie對於自己所作的每一個選擇,也絕不後悔,「當初你做得呢個選擇嘅時候,你諗番轉頭有咩意思嘞,不如將啲時間、精神擺喺當初自己選擇嘅事情上同努力做好佢。」

Cooking Mami
地址:觀塘開源道68號觀塘廣場地下G3號舖
營業時間:星期一至日08:00 - 21:00