2021年01月18日 

徐燦傑##企業管治由學生時代開始

2019-09-27 (週五)

識我嘅朋友都知道,喺我嘅專欄,甚至同好多唔同朋友合作嘅專欄,都關於企業管治,有好多唔同嘅題目嘅檢討!當然方法可以好輕鬆,又可以好嚴肅,呢個就睇下大家用邊一個嘅方法接收,係最容易入耳!就各顯神通!
自從證監會、交易所,對上市公司嚴謹嘅關顧」愈嚟愈利害嘅時候,企業管治就成為咗呢個監管之下,一個好好嘅基準指標!不同嘅學會,都以企業管治為佢哋喺好多唔同嘅講座、會議、甚至持續培訓成為咗一個主要嘅主軸!又好難怪嘅,企業管治講出嚟,又有氣勢,又好聽,如果唔同佢掛鈎,做嘢就變得唔與時並進!
今年香港特許秘書公會,正值兩個唔同嘅慶祝年(Double Anniversary)!企業管治,成為咗特許秘書公會,嚟一個重點發展嘅主軸!當然啦,公會嚟緊都有個改名都係同企業管治有關,我相信,工會喺唔同嘅會都擁有企業管治嘅框架之下,相信秘書公會一定可以喺企業管治呢個層次上,再上一層樓!
啱啱上星期,先出席佢哋企業管治周年活動嘅其中一個活動,就係企業管治文章比賽,呢個比賽係由香港七所大學嘅學生自發性參加,水準高就唔在講,更加值得嘉許嘅係,佢哋透過對一個題目嘅研究討論、搜集相關資料同個案,令到整篇文章喺一個有實務、有理論框架之下,帶出一個企業管治嘅新思維!
嚟緊,我知道佢哋本身嘅考試課程,將會進行一次「大改革」!為課程提供新嘅元素!包括:新加入嘅風險管理(Risk Management)同埋董事會動態學 (Board Dynamic),為課程注入全新嘅動力,亦為下一階作好準備!期間,見到浸大MCGC嘅課程主任:Dr Davy Wu,佢原來一早已經為呢個比賽做咗第一輪嘅評審,我能夠跟一啲星級講師學習,確係我嘅福氣!唔講唔知,原來而家浸會嘅碩士課程,都同香港特許秘書公會嘅課程接軌,即係讀完咗個Master之後,可以一次過豁免特許秘書公會嘅考試,直接得到香港同英國特許秘書公司資格!而佢哋嘅課程賣點,就係只係18個月,一般坊間嘅都講緊24個月,絕對符合香港人追趕時間嘅需要!真係一個「與時並進」嘅碩士課程!期待更加多嘅朋友,透過呢方面嘅培訓認知,為企業管治出一分力!

徐燦傑  (逢周五見報)
人稱Prof J,大學財金系前教授,金融達人,娛樂.經濟學主理人,諗deal, 做deal成為咗生活嘅一部份!