2020年12月1日 

徐燦傑##反洗黑錢與企管

2019-01-02 (週三)

香港作為國際金融中心,在自由經濟體系下資金都可以自由進出,但也衍生了相關洗黑錢的問題,近年多間國際知名金融機構因違反有關洗黑錢法例而被法定機構重罰,如果你係金融從業員、匯款公司、貨幣兌換商、放債人、地產代理人、會計師等等,你如何應對洗黑錢風險?請見如下生活例子分享:
Prof J:最近開咗間新公司,想喺銀行開戶口,但係銀行需要做好多「認識你的客戶」程序,更需要銀行內部多重審批,用咗我近兩個月時間都未搞得掂!
力奇:家陣開銀行戶口咁困難,都係反洗黑錢法例要求,早期香港反洗黑錢法例源於《有組織及嚴重罪行條例》,隨後《打擊洗錢及恐怖分子資金籌集(金融機構)條例》於2012年生效,條例廣泛應用於金融機構,法例要求金融機構必須對每個客戶進行「客戶盡職調查」 並保存紀錄,並需要提供員工有關反洗黑錢培訓及實行風險評估。另外如果有合理理據懷疑客戶洗黑錢,都應該向「聯合財富情報組」提交可疑報告。
Prof J:洗黑錢方法包括洗錢者用黑錢購買資產或物業,然後於短時間內套現,例如客戶購買人壽保險後短期內不合理贖回,又或者通過複雜的公司架構例如設立多間離岸公司進行跨境匯款,最後通過回購資產就可以將啲錢由黑變白!
力奇:除咗金融機構之外,洗錢條例在上年3月1日修訂後,額外要求信託及公司服務提供者例如秘書或信託公司,必須要申請牌照進行相關業務,牌照監管標準要求與金融機構睇齊,作為服務提供者只要有合理理據懷疑客戶洗黑錢,即使客戶最終無洗黑錢,都應該向「聯合財富情報組」提交可疑報告。如果無提供可疑客戶洗黑錢報告,而最終客戶有洗黑錢,咁服務提供者就會違反條例並有機會負上刑事責任。
Prof J:我知道「聯合財富情報組」同其他監管機構有啲唔同,佢無證監會或廉政公署嘅執法能力,其職責在於接收、分析及儲存各方可疑交易報告,然後作出綜合評估分析,睇睇客戶有無洗黑錢嘅嫌疑,並且將可疑交易報告送交本地或海外執法機構或世界各地財富情報組織處理。
力奇:反洗黑錢主要活動都係喺金融領域進行,各國政府都將反洗黑錢置於核心地位並且緊密合作反洗黑錢,因此反洗黑錢成為企業管治重要一環!

賴錦權(力奇)(逢周三見報)
香港上市公司秘書、大學碩士課程兼任講師、香港特許秘書公會資深會員,致力將知識輕鬆趣味化,作為其人生的生活命題!
徐燦傑
人稱Prof J,大學財金系前教授,金融達人,娛樂.經濟學主理人,諗deal, 做deal成為咗生活嘅一部份!