2021年01月21日 

徐燦傑##向遵理女教主「初心」讚好

2019-05-31 (週五)

自己都唔記得幾時認識June (我通常叫佢做阿姐,係時候開始改口叫佢做主席,但係我對主席呢個名非常之「抗拒」,因為我真係見到好多唔掂嘅上市公司主席,所以都係叫番佢做阿姐)。如果冇記錯,都係朋友介紹,時日如飛,由初初相識嘅補習天后,到退居幕後擔任企業管理,最終經過多番「苦」幹,成為上市公司主席!真係一步一印記,得來不易!
當日公司上市儀式,正值公幹未能參與,成為人生一個小小嘅遺憾!不過每個遺憾,都成為一個「印記」,呢件事,同樣都發生喺啱啱上市嘅羚邦集團(2230)一樣,都係要同師姐講聲唔好意思,人生如此,徒嘆奈何!
大家都知道,我喺香港嘅時間非常少,經常要出席活動,所以真係要提前約定!嚟緊嘅6月,我又要飛鄭州、檳城、吉隆坡,留喺香港幾日又飛去台灣!真係一不留神,就同好多朋友失聯!
感謝女教主,每次有甚麼「非商業活動」,佢都會將我擺喺心裏面!之前我已經出席過佢哋嘅「向上游」計劃(今年已經預留時間,亦會繼續支持),今次見佢支持另一個「另類」活動,我自己抱住「一試無妨」嘅心態出席同參與!見到向來「好打得」嘅阿姐,將人生嘅第一次奉獻,以籌委會主席身份,同青躍一班年輕幹事及義工,為一班有需要嘅女生付上心力,實屬難得,「用生命影響生命」,成為阿姐嘅座右銘!正如佢所講:多救一個得一個嘅精神,讓破碎的生命重建人生下半場!有意思!
做咗上市公司主席後,公司業績我唔識評論啦,佢喺資本市場嘅水平我就更加唔識講,加上佢哋公司「人才濟濟」,應該都唔係「揸流攤」嘅,留返佢哋嘅董事局向大家交代啦。但係,佢真正用咗上市公司嘅平台,透過企業社會責任(Corporate Social Responsibility,簡稱CSR) ,用生命燃點生命,之前照亮咗一班有需要補習嘅學生,而家再燃燒自己,照亮呢班無助女生嘅人生!我點都要畀個讚佢,更加難得嘅,係佢當日應承過我———毋忘初心,由始至終佢都貫徹呢份「實而無畏」嘅精神!比起好多以為自己做咗主席,就「一朝得志,語無倫次」嘅人,阿姐更加盡顯佢嘅真、善、美!正所謂,心正、眼明,事清,大家眼睛係雪亮嘅!繼續努力!

徐燦傑  (逢周五見報)
人稱Prof J,大學財金系前教授,金融達人,娛樂.經濟學主理人,諗deal, 做deal成為咗生活嘅一部份!