2020年08月7日 
2019-01-09


徐燦傑##重要控制人登記冊點備存?


根據《2018年公司(修訂)條例》,由上年3月1日起在香港成立為法團的公司均須識別及確定對其有重大控制權的人及備存「重要控制人登記冊」,供執法人員查閱,違反條例有機會負上刑事責任,尤其是中小企東主,應該如何備存該登記冊?
力奇:最近我開咗新公司,聽聞法例規定每間公司都要保存一份「重要控制人登記冊」,究竟係咩嚟㗎?
Prof J:係㗎!其實未有呢條法例前,成立有限公司都有一本簿記載所有股東、董事及秘書的登記冊,依家只係加多一個登記冊,即是說公司成立到清盤,除上市公司之外,所有喺香港註冊嘅公司,無論有限公司或無限公司,若果有人或法團直接或間接持有該公司股權、投票權或操控權達25%或以上,就要記錄在該登記冊內。
力奇:咁登記冊需要放喺邊度?係咪公開記錄?同埋有冇人有權查閱㗎?
Prof J:登記冊可備存於公司嘅註冊辦事處地址,如果唔係備存於註冊辦事處地址,公司必須喺登記冊首次在有關地方備存後,或喺備存嘅地方有任何更改後15日內,遞交表格NR2予公司註冊處。此外,登記冊唔係公開記錄,但係部分機構執法人員包括公司註冊處、證監會、金管局、稅務局、廉政公署、海關、警務處、入境處、保監局等可以突擊上嚟公司查閱登記冊,如果唔能夠提供,咁就會觸犯法例。
力奇:嘩!咁公司邊個負責提供登記冊畀執法機構查閱及作為聯絡人呢?
Prof J:公司須指定最少一名人士為公司代表,以協助執法人員查閱登記冊,指定代表可以係董事、股東或僱員,但係必須居於香港,或由會計專業人士、法律專業人士或信託或公司服務持牌人擔任。
力奇:有冇貼士點樣去保存呢個咁緊要嘅登記冊?
Prof J:所謂重要控制人已經不局限於「股份」概念,背後理念係要跟「最終受益人」接軌,即使操控背後可能分隔四五層,都必須要披露背後最終控制人,即係法例要銜接反洗黑錢之國際大趨勢!假設重要控制人人數不算多或者不是經常有變更,登記冊可能只係一兩頁紙,內容包括重要控制人嘅所需詳情及公司嘅指定代表聯絡資料,為咗方便容易備存及隨時畀執法機構查閱,可以同埋商業登記證放埋一齊,咁就一定唔會丟失啦!

賴錦權(力奇) (逢周三見報)
香港上市公司秘書、大學碩士課程兼任講師、香港特許秘書公會資深會員,致力將知識輕鬆趣味化,作為其人生的生活命題!

徐燦傑
人稱Prof J,大學財金系前教授,金融達人,娛樂.經濟學主理人,諗deal, 做deal成為咗生活嘅一部份!