2020年08月8日 
2019-05-30


明抽暗寸 張振朗反串激似陳松伶


早前黃心穎爆出偷食事件,連累唔少劇集冇得出街,仲搞到《法證先鋒IV》同《牛下女高音》要搵人頂替再拍過,正所謂「一粒老鼠屎整壞成鍋粥」!不過都唔及張振朗慘,事關佢唔單止要重拍《牛》劇,首次擔正嘅《堅離地愛堅離地》仲秒變「倉底貨」,難怪網民都封佢為「黑仔王」!好在,呢股「黑氣」冇影響佢其他工作,早排張振朗仲「反串」同宣萱、楊詩敏(蝦頭)合拍美容廣告。見張振朗化晒妝、頭髮長長勁有女人味,宣萱都讚佢嘅女性打扮比男人打扮仲靚,蝦頭更誇獎佢激似陳松伶!張振朗聽到梗係沾沾自喜啦,仲話:「我可以開拓另一個市場,就係美容界做代言人。」