2021年01月26日 

明抽暗寸 惠英紅 絲襪笠頭找數

2019-05-22 (週三)

惠英紅(小紅姐)果然係牙齒當金使嘅「真.英雄」!話說早排佢承諾,如果主演嘅無綫劇《鐵探》有33點收視,就會喺鬧市「快閃」笠絲襪扮安全套影相,結果收視前日終於出爐,《鐵探》大結局的7天跨平台總收視真係有33點!小紅姐都火速履行承諾,噚日朝早率先開Live預告喺某個港鐵站「找數」,冇耐佢就將短片Po上網,片中小紅姐用藍色絲襪笠頭,之後邊笑邊大步行入將軍澳港鐵站,佢話:「我依家就去買個麵包充飢。」見佢打劫咁款,身邊人都忍唔住講笑:「唔去銀行就冇事㗎啦!」場面爆笑!小紅姐仲不忘提醒同劇嘅姜皓文(黑仔)「找數」,而黑仔亦都好識做,即刻絲襪笠頭到商場買咖啡拍片放上網,仲Tag埋袁偉豪叫佢接棒㖭!