2020年08月16日 

星情飯局 搏盡的阿Q 龔嘉欣

2019-05-03

看完龔嘉欣(Katy)之前和何廣沛在夏威夷拍的《三日兩夜》,又在個人Instagram大派福利Show性感水着,不少網民大飽眼福,盛讚龔嘉欣身型Fit、無綫又多了一位性感女神!
其實,龔嘉欣一直在演藝工作中,都是默默尋突破,到近年所演的角色已非只是小家碧玉,她說:「公司安排到嘅、乜都做」!

撰文:Carrie Yip(carrieyip@msn.com) 攝影:David

諗法已唔同!
由2008年參演電視劇《盛裝舞步愛作戰》開始至今足足10年,龔嘉欣說:「一直以來嘅工作,我都唔會Say No,只係不停咁諗點樣可以做好啲!」
過往的龔嘉欣,給自己不少壓力,也曾因工作哭過不少次,「依家嘅諗法已經唔同咗,我會覺得做好目前嘅嘢、做好眼前嘅工作,先至最重要!我唔需要有好多好多嘅新計劃,唔會畀自己太大壓力,相信咁出到嚟嘅效果,反而仲好。以前我有時會喊㗎,但依家我識得將壓力變成推動力,識得點樣去冷靜自己,有時候我自己一個人坐喺度靜靜地唔出聲,其實嗰陣時,我多數喺度反省緊、諗緊點樣去處理一啲事情同工作,絕對唔係喺度發呆!」
工作搏到盡,之前龔嘉欣在拍攝劇集《殺手》一點也沒有欺場,頻頻的對打至手瘀腳瘀,當中更弄傷大腿留疤,甚至入院,龔嘉欣卻十分滿足,「我係演員,要敬業樂業。拍《殺手》都幾有突破,單係個造型,起初自己都接受唔到,係我有生以來第一次咁短頭髮、剷晒青,啲朋友見到都嘩嘩聲!今次打戲好多、有機會畀我挑戰演殺手,又同祥哥(黎耀祥)有好多對手戲,學到好多嘢呀。」2016年《萬千星輝頒獎典禮》龔嘉欣憑《幕後玩家》「程思汝」一角獲得「最佳女配角」,演技有一定的肯定,「我都幾阿Q精神,有時望住個獎,就會覺得要好好珍惜,個獎會係我喺任何辛苦拍攝過程裏面嘅鼓勵……咁就乜都解決到、捱得過!」

我會結婚嘅!
談到拍《殺手》的點滴,除了挑戰打戲,造型上都挺Sexy的。龔嘉欣為此也下了工夫、Keep下Fit:「喺夜晚就唔食飯、戒澱粉質,每晚仲會做收腹肌嘅運動,都幾有效嘅!」
幸好今次飯局之約,已完成《殺手》,龔嘉欣正開始拍民初劇《大醬園》,造型較密實,令她暫且可以放鬆開懷吃一頓!龔嘉欣精心細選帶我到旺角通菜街一間上樓食店,嘗地道風味,感受如大牌檔的風情。「呢間餐廳,之前第一次入到嚟,就覺得好有特色,有好多打卡位,好啱鍾意自拍嘅人!佢哋嘅食物質素好好,好多小炒同一啲小食,譬如呢啲豬生腸、墨魚係好街邊嘅嘢食,好代表到香港,呢度整得好好食,我好鍾意。個杏汁燉豬肺湯都好好飲,每日限量15煲,好滋潤,啱晒我哋呢啲捱夜又要成日講嘢嘅人,補一補嘛。」
女人要補,湯水、休息等以外,戀愛也是妙藥。「少婦聯盟」的陳凱琳生了B、沈卓盈也為人妻了,身為盟友之一的龔嘉欣呢?「我知道好多朋友都替我心急,但係呢刻嘅我,都冇時間去互相了解,我係個唔識同一個時間去Handle好多嘢嘅人,不過,大家放心,我係會想結婚、生小朋友嘅!我希望將來嘅另一半會支持我繼續做戲,如果有一日結咗婚、步入人生另外一個階段之後,我希望係多咗一個身份咁解,工作同家庭並存,因為我真係好鍾意依家嘅工作。」龔嘉欣認真地說。

女人街食飯公司
地址:旺角通菜街1A-1L威達商業大廈1樓B室
電話:2685 1618
平均消費:約$200/位
泊車:栢裕商業中心停車場
營業時間:11:30-15:00、18:00-22:30

主持
Carrie葉嘉儀
傳媒人。喜歡「吃」,皆因非只飽足五臟,更可透看人情。