熱話 時尙 食玩 生活 旅遊 娛樂 親子 專欄 着數

星情飯局 搵食拍檔 鄭俊弘‧譚嘉儀

2019-08-30 (週五) 08:00 上午

歌手鄭俊弘(Fred)與譚嘉儀(Kayee)近期成為《流行經典50年》的新主持,同公司的他們,私底下老友鬼鬼,說到「食」呢,兩個亦十分合拍的。
鄭俊弘和譚嘉儀都愛吃日本菜,鄭俊弘也喜歡嘗日式燒酎,所以來到SARA,完全滿足兩人的飲食喜好。

撰文:Carrie Yip (carrieyip@msn.com)
攝影:Rico

飯盒多美味
懷舊音樂節目《流行經典50年》於兩年前開始播出,有不少粉絲支持,而鄭俊弘與譚嘉儀該是節目至今「最年輕的主持人」。
「起初接到通知要主持呢個節目,好興奮,但都驚㗎!自己唔咁識講嘢,但後來知道有Kayee,就放鬆好多!Kayee一直主持Music Cafe,有好豐富嘅主持經驗,我成個人都定番晒。」聽到鄭俊弘這樣讚賞,譚嘉儀靦腆後哈哈大笑,說:「同阿Fred合作,有一定嘅信任。其實今次會對住好多前輩,而且有機會見好多有分量嘅歌手,係一個非常之好嘅學習機會!」
鄭俊弘與譚嘉儀對這次新工作十分興奮,譚嘉儀更透露鄭俊弘常主動要求對稿,十分認真,「夾着阿Fred唔錯㗎,佢仲好照顧我,幫我買埋美味嘅飯盒㖭!」
飯盒會有多美味呢?「TVB Canteen啲燒味飯,唔錯㗎!叉燒都好食,特別係『雙餸髀飯』,有雞髀,正㗎!」鄭俊弘繼續說:「其實一入廠,綵排之間往往唔夠時間畀你坐喺度好舒服咁食埋個飯盒,同埋工作緊要啲,錄完先再慢慢食!」

鐵質的味道
今天就是和鄭俊弘、譚嘉儀慢慢食。
本身廚技不錯的鄭俊弘,挑選餐廳的時候,自言都會揀一些特別的食店。重新開業的SARA,當中的日本酒放題和日本水魚菜式就夠噱頭。
鄭俊弘說:「佐賀有『清酒之鄉』美譽,呢度嘅日本酒放題可以試到好多款佐賀特色地酒、燒酎及威士忌等,同埋呢度幾好坐又就腳,一班Friend坐埋飲下、傾下,唔錯㗎!」譚嘉儀試了一口梅酒,即表示「好飲!」
聊着聊着,侍應端上其中的招牌水魚菜式。水魚含有非常豐富的胺基酸及膠原蛋白等,日本人更視水魚為增強體力的食材。
心急的鄭俊弘一口把水魚的膽汁燒酎喝掉,大家目瞪口呆,譚嘉儀再奉上血燒酎,這回鄭俊弘淺嘗一口,表情古怪地說:「我飲到有啲『鐵』味!」鄭俊弘吃出食物鐵質的味道,惹得譚嘉儀取笑他是「神舌」嗎?鄭俊弘一點介意也沒有,更細心把水魚湯分給大家,「好清好好飲喎!」譚嘉儀報上感恩的微笑。
這頓飯,吃得很開心⋯⋯人和人的相處,簡單輕鬆就可以,拍檔更如是。

SARA
地址:銅鑼灣霎東街15-21號12樓
電話:3620 3491
平均消費:約$400/位
泊車:銅鑼灣時代廣場停車場
營業時間:18:00-02:00