2021年01月21日 

星情飯局 期待下次的突破 文凱玲

2019-06-21 (週五)

第一次接觸文凱玲(Connie)的時候,已對她的印象不俗。那次是在深水涉區某義工活動,看到她對那些智障人士的細心關懷,非常真摯。
拍了電影《鴨王2》,文凱玲曾被冠以「新一代晶女郎」稱號,但鎂光燈背後,文凱玲斯文而有些內斂,屬慢熱的女生。之不過,今天美食當前,談起了家人、話將來,文凱玲滔滔不絕……

撰文:Carrie Yip (carrieyip@msn.com) 攝影:David 髮型:Tin Ngai

明白單純的珍貴
新界長大的文凱玲,在中學時代已做兼職,目的不是自己賺錢買花戴,是希望可幫補家庭的支出,「不只家人,我哋要識得體諒身邊的人。我15歲已經冇問屋企攞零用,畢業之後就照顧埋屋企,希望盡力去改善屋企嘅生活質素。細個嗰陣住過劏房,自己嘅起點唔高,更加易會滿足。讀大學時,見到好多競爭、一啲手段、搏晒命咁,其實嗰剎那唔係咁適應,不過,人生唔同嘅經歷,一定會有上有落,令我更加明白單純嘅珍貴。」
現在文凱玲仍與父母同住新界,她享受而珍惜,「唔使開工,好多時會喺屋企食飯,阿媽一定會煲湯,啲料好足,非常好飲;同阿爸阿媽出街食嘅話,好多時去食日本嘢,魚生冇加工過、清清地,對身體都健康嘅,當然仲要揀食材新鮮嘅日本餐廳啦!」像文凱玲這次帶我到的日本餐廳「澄」,就是她公司同事常到的店,她試過後對大廚的廚技充滿信心,特別是各款的海膽、野生Toro及深海池魚,都是必食之選。「我好鍾意食海鮮同雞肉,但依家做幕前,少咗食飯、麵,不過都好鍾意食炸嘢,如果我食得太少,就會好易忟。為咗上鏡靚啲,開始學計卡路里,Mark起每日食啲乜,我發覺食碳水化合物太多,成個人會好腫,有時都畀自己食幾羹飯,唔食加工嘢,依家食得啱、又飽又唔會肥咗!」

電視撈飯好溫馨
文凱玲愛爸媽,除帶他們去食好的,也不時一起去外遊。「去過好多地方,見到好嘅,都想畀爸媽感受吓、去玩吓。有次帶佢哋去德國旅行,住咗朋友屋企。有日我媽煮咗豬骨粥,朋友覺得好新奇⋯⋯嗰時枱面上擺咗好多香腸等德國食物,畫面好有趣,好似喺度文化交流咁!」一頓飯,不同的人融洽地坐在一起,單純的愉快。
「身教好重要。我爸媽係初戀情人,到今日都相親相愛,好錫家人,對朋友亦好。我嘅學業、工作,阿爸阿媽都支持,畀我話事,佢哋覺得我嘅人生,係自己嘅決定、自己要負責。」文凱玲投身演藝圈,她爸媽十分支持,就算需要一些大膽演出。「以前,冇人見過我喊。開頭拍啲喊戲,覺得難!係阿媽由細同我講:『你係家姐,唔可以咁易喊!』入行後,喺情感上,有一啲抒發,原來我係識得喊㗎。大學時讀心理學,幫到我更有系統去分析角色,令角色更立體,同埋接納多啲人哋嘅睇法。冇人嘅諗法係一定啱,有時好唔開心,肯退後一步,就會見到有好多出路。」
其實,文凱玲是個有想法的女生,妹妹畢業「出身」,家庭的擔子輕了,才安心去拍戲。「拍《鴨王2》真係性感大膽,但要做演員,性感只係其中一樣,荷李活好多男、女巨星,都可能為某套電影裸露過,係一個專業演員應該嘅。做咗就做咗,我唔會諗番轉頭,好多人因劇集《荷里活有個大老千》嘅『明珠』話我成功洗底,咁即係觀眾睇到我嘅轉變,代表我有可塑性,係值得開心嘅事!憑『明珠』,亦見到電視劇嘅威力,我係電視撈飯長大嘅,同屋企人一齊食飯睇電視好溫馨;由細睇到我大嘅Auntie,話依家同我坐埋一齊飲好開心!所以,希望將來可以試更多唔同嘅嘢,可以做到羅蘭姐咁!」相信,觀眾亦期待文凱玲下一次的突破。


地址:跑馬地昌明街1-3號地下
電話:2803 5558
平均消費:午市約$300/位;晚市廚師發辦套餐$1,580/位
泊車:昌明街咪錶位
營業時間:12:00-15:00、18:00-23:00