熱話 時尙 食玩 生活 旅遊 娛樂 親子 專欄 着數

星情 飯局 信心大邁步 關楚耀

2019-01-18 (週五) 08:00 上午

踏入2019年,關楚耀(Kelvin)在澳門完成了《FOCUS關楚耀演唱會2019》,於新一年有一個好開始。演唱會上,粉絲們的熱情支持,給予關楚耀不只是一晚的快樂和難忘回憶,也是一股強大力量和信心,邁步向前!

撰文:Carrie Yip (carrieyip@msn.com) 攝影:Ronald

鍾意咗做戲
關楚耀有一個曾是唱片高層的父親,契爺譚詠麟也在圈中舉足輕重,論外形也不輸蝕,關楚耀的「先天條件」極佳,但之前也給大家兜兜轉轉的感覺!
「呢幾年,好多人覺得我只係擺唱歌喺口邊,反而多咗演員呢個身份,其實我永遠記得唱歌係自己入行嘅第一步,一直都有一班支持嘅歌迷。喺音樂上,我一直都求突破,譬如《求生》嗰首歌,曲風好唔一樣,重電子音樂元素,但喺一啲數字(點擊、收聽等)就唔係好理想。我自己鍾意電子嘢,但亦明白市場需要,所以會平衡一下,做啲大家比較容易接受、主流啲嘅歌,先至可以畀多啲人了解到我嘅音樂。」《求生》這首歌不錯的,唱和Rap的部分都很好,MV亦有電影感,只是去年中推出,Timing和人氣都不太配合,換着是播完《特技人》之後,相信會有更多反應和口碑,就像《FOCUS關楚耀演唱會2019》一樣。
「好開心憑《特技人》Duncan呢個角色入到屋,算係搞笑同認真都Handle到。我出到街,有一啲小朋友都識得嗌我做Duncan哥哥,估唔到第一次入電視拍劇,有咁好反應,仲同台前幕後都變成好好朋友!同埋令我發現咗自己都幾鍾意做戲,亦畀真實嘅『關楚耀』暫時休息一下,哈哈。」而且與譚嘉儀合唱此劇的插曲《Lonely》,亦成為2018勁歌金曲優秀選的得獎歌曲,關楚耀更是感恩。

冇偶像包袱
唱歌和拍戲之外,關楚耀也曾主持過飲食節目,提到入廚,完全難不到他!
「大概4年前,我做過飲食主持,仲要連拍咗10幾集,最辛苦係自己口才唔係咁OK,要記啲餸點煮,又要訪問嘉賓,真係唔易!不過,係一個好好嘅訓練,考到臨場執生;至於煮嘢,想當年我喺加拿大讀書嗰陣,好多時都自己煮,我最叻煮砂煲臘味飯,煲湯亦唔錯嘅。我唔會點揀飲擇食,只係唔食內臟,唔係咁健康!個人來講,比較鍾意中餐,同屋企人一定去飲茶㗎;同影相班Friend就會去大牌檔,小炒、打邊爐都唔錯,最緊要係好味。」關楚耀很真性情又貼地,只是有些人仍會覺得他有點「少爺仔」、未拋掉「偶像包袱」!
「上次拍《特技人》要裸跑,我冇忸怩、照拍,只係事先自己加操要Fit啲。好多人話喺TVB拍劇好辛苦,初頭係有啲擔心㗎,連契爺(譚詠麟)都問我熬唔熬到,事實係試過瞓幾粒鐘後又再拍,但啲女演員咪仲辛苦,男演員起碼上、落妝護膚嘅時間短好多!依家嘅我係完全冇偶像包袱,呢個年代做演藝,可以話好行咗,對比舊陣時嗰啲前輩可以好貼地好多!自己入咗行12年啦,好想比其他人同粉絲知多啲我個人係點,曾經試過冇晒機會,依家我每一次演出都好珍惜,同埋會諗多啲、點樣去做多啲好嘅嘢出嚟!」關楚耀堅定的說。

雲長小龍坎老火鍋
地址:尖沙咀金巴利道28號君怡酒店1樓
電話:2499 2223、2591 9699
平均消費:約$380/位
泊車:美麗華廣場停車場
營業時間:12:00-01:00

主持
Carrie葉嘉儀
傳媒人。喜歡「吃」,皆因非只飽足五臟,更可透看人情。