2020年08月10日 
2019-09-27


林海峰是但噏尾場 黃秋生嗌「放煙」趕觀眾


林海峰假紅館舉行的Talk Show前晚圓滿結束,嘉賓之一的黃秋生繼續暗嘲香港荒謬現況,見台下觀眾不肯走,秋生即打趣道:「再唔走就放煙!」最後更吹奏《願榮光歸香港》送驚喜。

林海峰(Jan)一連7場假紅館舉行的《林海峰是但噏Happy Monday 2019》前晚尾場,獲謝安琪、張繼聰、徐天佑及方皓玟等撐場。當晚8點半準時開騷,全場觀眾大叫「林狗下台」,其間,每晚都揮灑自如的Jan一講到太太及兩個女時,竟然發台瘟足足NG了4次,他抵死自嘲:「今晚最後一場,仲要錄影,我唔會講兩句講到10點啩。」

吹奏《願榮光歸香港》
至尾聲,嘉賓黃秋生和葛民輝(阿葛)分別化身「黃經理」及「葛主任」上台,秋生繼續暗嘲香港荒謬現況,譬如講到辦公室人物,他形容有種高層:「眼細細,着件旗袍,成日講廢話,又人工高,嗰啲叫Yellow Object。」最後問台下觀眾是否不走,秋生更笑謂:「再唔走就放煙,大家唔走唔好打爛公司啲嘢,拎支筆扑你個頭。」接着以口風琴吹《有隻雀仔跌落水》及《願榮光歸香港》,全場即自動亮起手機互動,令秋生感動得呆了一呆。

迎難而上開騷
騷後提到現時社會氣氛差,問是否更難令觀眾開心?Jan說:「從來都有難度,但難都要做。」阿葛則謂:「係迎難而上。」對於秋生今次在紅館唱足7晚,Jan即爆秋生有意舉行演唱會,惟對方卻稱已打消念頭,因開騷太辛苦,若要做便在容納30人場地或等到80歲再考慮。