2020年08月14日 
2019-08-29


柔情似水 姚子羚


早前捲入「四角戀」的姚子羚,拋開過去積極投入《包青天再起風雲》的劇集宣傳,飾演與自己性格南轅北轍的紀念念,一向予人小鳥依人形象的她,私下卻是一個剛強、隨心,比男人更加有氣概的「女子漢」,但面對感情,她仍會表現出柔情的一面,並希望能得到一段簡單的愛情。

撰文:劉寶如
攝影:陸羽勝
化妝:Henry Li
髮型:Taylor Wan @ Hair Corner
服裝:MURUA@ITHK
配飾:Dearbell2ling
場地提供:ToGather PartyHouse

飾演紀念念的姚子羚在《包》的頭兩集就展示了其驗屍官的作用,幫助包拯尋找真兇。為了演活角色,未開拍前她不斷上網做功課,翻查相關的資料。但在劇中,她還有其他作用。「紀念念唔單止同包大人辦案談情,仲有其他功能,咁就要賣個關子啦。」

不一樣的包青天
包青天這個深入民心的經典,曾被「翻炒」過無數次,《包》又如何作出突破呢?子羚表示,因為是包大人的前傳,為豐富這個角色,以嶄新的方式呈現他所不為人知的感情線,「以往只係見到包大人鐵面無私嘅一面,但係呢齣戲入邊佢係一個非常有情有義嘅人。而且今次加咗唔同嘅喜劇元素,例如睇落好正氣凜然嘅展昭,喺劇中係負責搞笑嘅。」她還形容《包》加入不少現代元素,以西方的查案方式融入劇中,以第一身去假設犯人如何去行兇,這種手法有別於傳統古裝偵探劇。

同好姊妹「打鬥」
子羚在劇中擔當驗屍官,除了與包大人有互生情愫的感情線外,還會與胡定欣飾演的雲千雨展現情義兩難全的局面,當中的對打戲更是讓她深刻難忘。與閨蜜定欣相識多年,這次卻是首次與對方拍打鬥戲,「呢次係第一次喺橫店吊威也,仲要好姊妹拍打戲,都深刻嘅,要做啲翻騰嘅動作有一定難度。而且呢次係我首次拍古裝打戲,動作上同時裝打戲有好大分別,亦都比較講究功架,動作上要好小心。定欣會教我『有時會打錯,不過唔好理擺番個靚樣先。』」

日後小心擇偶
子羚形容紀念念楚楚可憐,那麼她與這角色又有甚麼相似之處呢?「有好多人就覺得子羚斯斯文文,比較唔係幾講嘢,但真實我係一個比較剛強一啲嘅女仔,同比較『男仔頭』。認識咗就知,自己冇咩所謂,非常簡單,有自己強悍嘅一面。」她否認自己是一個女強人,認為女人當自強也非常辛苦,要變強的原因是要懂得保護自己,應對工作需要,「如果有個人,佢能夠照顧你,令你安心嘅話,都唔需要咁強悍嘅。我覺得女強人嘅強係喺你嘅工作度,即係你對工作嘅一種執着。等於你接咗一部打戲,如果你軟弱嘅話『就會話好痛』,咁我覺得痛係在所難免,但你要從痛苦中學習得到經驗。」
經歷過「四角戀風波」,子羚已與前任斬斷情絲,面對情傷,直言日後會小心擇偶,感情事就隨緣,只要做好分內事,相信上天亦不會待薄自己,目前還是專心工作,不想那麼多,「我追求嘅都係一段簡單嘅愛情,唔需要生活好富庶,最緊要係大家互相信任、互相尊重、簡簡單單,你明白我,我明白你,互相扶持一路行過去。」