2020年08月13日 
2019-10-30


治療痛症新方法多 視需要配合不同專科


人有神經線便一定會感到痛楚,一提起痛,最多人會想起食藥止痛,但若食藥仍無效,是否代表痛症無得醫?

陳伯飽受痛症多年折磨,一天他遇到在公立醫院做物理治療師的世侄Andy,提及他在公立醫院專科診所輪候了四年,要再等五年才可做手術。

Andy:最初都以為有痛只可食藥同做手術,但係我聽個痛症科醫生講,止痛藥間唔中食吓冇乜所謂,食得多就對身體唔好,唔單止影響腸胃,長期亦會增加心臟病和中風風險!

陳伯:係呀!我鄰居林太就係日日話痛,日日都食止痛藥,最後胃出血入埋深切治療部。佢都有聽醫生吩咐食埋胃藥,但最後都搞成咁!

配合其他專科處理

Andy : 個痛症科醫生話,他們用藥的方式與其他專科截然不同,無論配搭和種類都有一套不同的哲學。況且用藥只不過是他們其中的一種「工具」,還有不同形式的注射、射頻和神經阻滯幫助病人。他們還很主張配合其他專科去處理痛症,好似我工作的醫院就由醫生和物理治療師一同會診。試過有病人肩膊痛,醫生幫她用超聲波導引打完針後,我們即場幫佢做物理治療,唔使一個月已經好返晒!

陳伯:咁神奇!點解我喺香港住咗咁耐都冇聽過呢科嘅?

Andy:其實如果唔係我喺醫院同佢哋合作,我都唔知佢哋搞邊科啦!以我所知,好多醫護人員都唔知呢科,醫學院又冇教,所以醫生係會唔識轉介。

陳伯:點解好似幾「困局」喎!

Andy : 係呀!你知唔知好似台灣、新加坡和韓國等,政府給痛症科的資源是香港的數倍,因為當地政府唔係剩係睇數字做人,決策的考慮也不會那麼「政治化」。

癌症是「得了個痛症」

陳伯:我有朋友最近診斷生癌,佢好驚痛,咁搵痛症科又得唔得呀?

Andy : 我喺痛症科診所見過嘅症乜都有,只要是痛,由頭頂到腳趾尾佢哋都會醫。所以你嘅朋友可以試試,因為以我所知腫瘤科醫生唔係個個都有興趣和時間醫痛。

陳伯:但係我朋友生癌,我驚佢喺政府排期等睇醫生等唔到喎!

Andy : 咁又唔使咁灰!個痛症科醫生話喺私家睇痛症科嘅費用,都係大概一兩張醫療券左右。依家亦有些痛症科醫生在九龍中搞緊義診,你可以叫你朋友試試看!

最近拜讀鍾尚志教授的一篇文章:痛症。當中有兩句說話: 「醫生,我不怕死,但卻擔心受苦!」又說患上癌症的人是「得了個痛症」,正正就帶出了痛症的深遠影響。癌痛的治療若只局限於傳統的藥物治療,未必可以百分百保證病人免於苦。現在有更多的方法譬如舌底、噴鼻和介入性治療都是不錯的選擇。有些速效藥物甚至可以在家中使用,可以在十分鐘內見效!大家有需要可詢問專業意見。