熱話 時尙 食玩 生活 旅遊 娛樂 親子 專欄 着數

王祖藍 挑戰不可能的任務

2019-01-28 (週一) 08:00 上午

今年賀歲檔真熱鬧,除了有周星馳、彭浩翔、林敏驄執導的賀歲片外,仲有王祖藍處男執導之作《你咪理,我愛你!》加入戰團!雖然面對一批強勁對手,王祖藍都直言冇信心撼贏周星馳等,但他說:「如果你支持港產片有更多新意、創意就入嚟睇啦!」這部純港味的歌舞片,動用60名演員、百多名舞蹈員,實行上下一心為港人大放笑彈,「唔好講話歡唔歡喜,淨係一班演員、Dancers連場歌舞,已經值回票價!」還有影帝、影后級的曾志偉、毛舜筠及王菀之等助陣,也算是信心保證了吧!

撰文:黎寶倫
攝影:Sing
髮型:Ted Yeung @ i i Alchemy hair & nail
化妝: K.T. Tsui
服裝:oplus2 , RF
造型:Dicky Lee
場地:御一共享空間


對上一部港人熟悉的華語歌舞片,大概已追溯到05年由張學友主演的《如果.愛》了,惟這齣戲卻是中港合拍片,真正的港產歌舞片則寥寥可數,近數十年來更可以說是絕迹了!不過王祖藍不服輸,於今年賀歲檔推出新片《你咪理,我愛你!》,「實質中文歌舞片嘅歷史好慘淡,但我都係有啲唔甘心,一來自己喺演藝學院嘅時候已經好鍾意歌舞片,二來大家都覺得英文歌舞片好好睇,點解中文唔可以有一部呢?咁試一部又唔係好過分啫!」他說。
性價比高
回想整個製作過程,首執導筒的祖藍認為難度最高是在20天內,以有限的成本完成拍攝;因此,今次不論幕前幕後的事前功夫也做到足,單是編舞、排練部分已花了數個月去準備,「最難一場係港鐵站大歌舞,因為要港鐵收咗先可以拍,又要喺佢開門前完成,實質凌晨拍得3個鐘,咁百幾人嘅歌舞點拍呢?惟有夜晚11、12點喺郵政總局隔籬塊大空地排,排完衝落去拍,快閃咁!」如此有效率,難怪主演的毛舜筠也大讚祖藍是好導演,他卻謙稱:「因為係歌舞,冇得臨場先度,所以寫歌詞時會諗段戲點做,錄歌時又會同演員排一次戲。特別要多謝風車草劇團,呢個舞台劇佢哋演咗好多年,係佢哋嘅琢磨令呢套戲咁成熟。」
群星鬥戲
除了舞台劇版演員襄助外,是次祖藍更碌盡「人情卡」,號召60名演員、逾百名舞蹈員傾力演出,包括王菀之(Ivana)、曾志偉、容祖兒、鄭秀文等,「今次全部演員都好好,一個Hea嘅都冇,好耐冇見到港產片有咁良性競爭、齊心嘅氛圍,好似《家有囍事》,佢好睇嘅地方係大家鬥戲,而呢部戲係每一場、每一位演員都搏老命。」值得一提的是,今次Ivana更將演、唱發揮到極致,惟她主演的電影《如珠如寶》亦於同期上映,可會擔心影響《你》片票房?祖藍說:「有幾多個女演員可以一期賀歲檔有兩套戲呀?作為朋友,我係戥佢高興,佢以後會好穩定,係搶手貨。當然,佢喺我部戲度一定會演得好啲啦,哈哈!」
娶啱老婆
自導自演的《你》片已完成,接下來應該好好享受一下天倫樂吧?怎料,初為人父的祖藍卻指囡囡Gabrielle冇本心,皆因對方只愛看靚仔,而現階段,最緊要是多陪太太李亞男,「我成日都抱BB㗎,但佢成日瞓,瞓到唔係好認得我。我覺得呢一刻對老婆嘅支持緊要過BB,因為佢會死頂,有時辛苦都唔出聲,所以要摸老婆心情。」說到亞男由貪玩大女孩轉變為賢妻良母,他都不禁大讚:「依家真係覺得冇娶錯老婆,佢真係一個好好嘅媽媽,好享受做媽咪。」那麼可恨生多個仔?「想想想,唔理仔定女,起碼要兩個,但等個女穩定咗先再生第二個啦。」而祖藍的目標,是於太太35歲前追多個BB。