2021年01月21日 

蕭潤邦 鬼叫我窮啊頂硬上!

2019-06-21 (週五)

問人稱「生煎包王子」的蕭潤邦:「有咩驅使你去搞飲食?係愛定係責任?」他答:「係窮呀!」
不少人開食肆是為了圓夢,有些人則當投資錢滾錢,但對於平時甚少下廚的蕭潤邦來說,純粹當年約滿唱片公司後,前路茫茫,在機緣巧合下嘗到正宗上海生煎包的味道,令他發現新商機,決定與拍檔在港開舖賣包,「你仲有其他選擇嘅時候先至會鼓起勇氣,但你冇任何選擇嘅時候就一定要做,所以我做生煎包一定唔會係為理想而開始。」或許當初被人冷嘲熱諷過,但如今由別人口中的「不務正業歌星仔」發奮成為4舖王,那少許的打擊又算甚麼?而接下來,於旺角開設新店「堅信號上海生煎皇」後,他計劃今年內再多開3間分店,希望扎好根基後便衝出香港。

撰文:黎寶倫|攝影:fr3d3r1ckl4u

現年38歲的蕭潤邦(Oscar)可算是事業、愛情兩得意,不單止於去年底抱得美人江若琳歸,升格幸福人夫,上月初與友人合資的生煎包專門店,亦於旺角開設第4間分店,認真可喜可賀!不過奇怪的是,新店的招牌忽然由沿用開的「正宗上海生煎皇」改為「堅信號上海生煎皇」,到底何解呢?原來背後的意義與蕭爸爸昔日經營的「堅信植毛印花廠」有關……

新舊融合
「喺『生煎皇』開嘅時候都冇一個寶號,直至呢兩年諗,不如擺番公司嘅精神落去畀人知啦,於是就用番爸爸嘅『堅信號』嘞。」Oscar說。秉承父親「堅持信念,相信自己」的理念,招牌上撇除「正宗」二字,主要是不想受局限,希望把更多創意和新元素投於產品中,好似今個月起,新店會限定發售自創的「港式燒鵝髀小籠包」,「因為呢條街好多遊客,我好想將香港Icon聯乘上海小籠包,咁就諗其實香港嘅燒鵝都好出名,不如用燒鵝髀去做啦,結果試咗超過10間燒鵝,食到嘔先搵到呢間最好食!」
為了照顧一眾素食者,店舖又與Green Monday合作推出各種素食,好似「日式咖喱薯仔新豬肉小籠包」、「新豬肉碎四川擔擔麵」等,「我哋用新豬肉去配搭一啲新菜式,推出後都多咗一群素食者,生意上一定有衝擊。有時去素食超市買材料,佢哋知我哋賣緊素小籠包同生煎包,都覺得我哋係英雄,令佢哋試到從未食過嘅嘢。」

被潑冷水
稍後全線分店逐一翻新,並統一改名為「堅信號上海生煎皇」,估計花費也不少。眼見Oscar由門外漢升呢4舖王,更聞說兩年前已月賺7位數,想必很「疊水」吧?他卻苦呻搞飲食甚艱難,「真係賺得好少!飲食業就好似昆蟲咁,不斷掙扎,雖然月入差唔多7位數,但租金近20萬,佔盤數嘅20%,人工又超過30%,得番嗰五成,仲未計柴米油鹽、燈油火蠟。但冇所謂,最緊要我哋肯做、肯試,希望食客多啲支持有心嘅食肆,唔好等佢哋結業先去打卡、懷念,否則好多舖頭都無法陪你長大。」
背後辛酸又何止這一點,正所謂「萬事起頭難」,回想當初與友人赴上海拜師學藝,再膽粗粗回港開舖,除了難以請人外,更遭親戚冷言冷語,「佢哋講好多自己失敗嘅原因畀我聽,覺得連佢哋都失敗,所以我呢啲咁嘅人都一定會失敗!可能我喺佢哋心目中係不務正業,得閒唱吓歌又得閒冇嘢做,咁點會做到生意呀!」Oscar憶述。

任性不再
結果激勵Oscar發奮圖強,又多得父母與一眾好友的支持,最終成就今天的「生煎包王子」,現總算吐氣揚眉了吧?「會,每次佢哋講呢啲嘢,始終人都係會嬲咗先,等啖氣過咗嘅時候,我就會諗佢哋講嘅嘢係咪啱,如果真係啱,我點去排除佢哋講嘅嘢呢?其實員工已經過100人,你唔可以好似以前咁『點解唔得呀?我話得就得!』真係唔得嘅時候你就會對唔住班手足,所以依家冇咗以前嗰種青春熱血同任性,真係要諗嘢廣闊啲,否則會令好多人失望。」他亦坦言未有介懷當日反對或打擊自己的人。
說到成功之道,Oscar則寄語創業人士別想到冇錢就放棄,「依家啲人覺得冇錢就冇得搞,但我嗰時就覺得唔會蝕錢,因為我都冇錢!所以千祈唔好諗你想做嘅嘢要幾多錢,因為做每樣嘢開頭5步都係唔使錢,好似做生煎包咁,唔代表學嘢要錢㗎嘛,甚至佢畀番人工我㖭,到你學到一半就知道要錢去開舖,到時就會有好多人支持你、夾埋一份。」

堅信號上海生煎皇
地址:旺角花園街3-5號
鴻威大廈地下7號舖
電話號碼:2323 2374
營業時間:11:00 - 00:00