2021年01月18日 

退休不退役 梁家輝

2019-06-06 (週四)

影帝即是影帝,縱然一個角色被無數演員翻演過,除無懼比較外,梁家輝還表示:「冇咩嘢係牽引住你,話你一定要做到好似佢咁,雖然有幾套戲講呢個賊王嘅嘢,但喺呢套戲入面,我係可以好全新咁樣去演繹一個我哋所建立嘅人物。」說時淡淡言,卻無意間流露出點點霸氣!

撰文:黃寶華
採訪:黎寶倫
攝影:fr3d3r1ckl4u
場地:Hotel VIC 海匯酒店

電影《追龍II:賊王》 陣容鼎盛,由梁家輝(家輝)、古天樂(古仔)、林家棟及任達華主演,梁家輝飾演90年代賊王張子強,綽號「大富豪」,戲中叫「龍志強」,只看海報已知角色氣勢十足,令人不敢直視。家輝指角色揣摩的空間少,因為資料不多,「只從相入面去判斷佢大概係一個咩人,佢犯罪後披露嘅過程,係點樣去勒索,點樣去綁票。再根據劇本成個故事情節架構去推斷,用佢戲入面同嗰啲人嘅經歷感情去設計呢個人。」

創造角色
不少演員曾飾演過張子強,觀眾對於這個「世紀悍匪」已有既定印象,家輝認為不同演員及導演處理手法不一,不一定要跟隨前人的做法。為突出張子強愛錢的個性,他特意用數月時間留長指甲,方便點算鈔票,家輝形容角色好「恨」錢,「龍志強數錢係數到好似數啤牌咁,手指公數完,第二隻手指數,數到第三隻手指,就好肯定知道呢疊錢有幾多錢,呢個人永遠同錢都係分唔開,而且佢對錢嘅敏感度係咁。」除愛錢外,他認為這個角色是世上最孤獨的人,慣用感情去欺騙身邊所有人和兄弟為自己賣命。
新戲陣容強大,集合4大影帝,家輝透露4人曾於電影《黑社會》合作過,又笑謂大家這次是洗脫黑社會背景後再次合作,「今次大家都有分正反,但都洗甩咗黑社會呢個身份,大家可以喺一個咁全新嘅古仔一齊走埋做嘢 ,分別飾演唔同嘅角色,今次嘅合作係好有默契。」電影中家輝和古仔的對手戲最多,對方飾演臥底「何天」,埋伏於賊王身邊,兩人分別代表正邪,單靠眼神就能演戲,「有好多係兩個人嘅內心戲,冇乜嘢對白,望對方嘅眼神入面係會有好多好複雜嘅情緒,包括猜疑呀 ,唔信任同你虞我詐 ,但又要喺眼神上面表達到一種關懷。」兩人的演出猶如高手過招,家輝都大讚古仔「識飛喇」。

退休生活
問到在演戲方面還想繼續挑戰甚麼新事物,家輝謂自己不會再想任何挑戰,反而更想挑戰導演對自己的幻想,若有一個他從未演過的角色劇本又值得演,他就會接拍,又強調自己只是退休但不退役,「咁多年嚟我真係退咗落嚟休息,我喺工作同休息時間平衡得好好,但遇到有吸引力嘅角色,我都會考慮,我係退休但唔係退役,未演過嘅角色會考慮多少少,退而休息但不退役。」
家輝於5月參與了青島的慈善跑,並作為領跑員帶領視傷健人士跑馬拉松,明星總給人一種很風光及與別不同的感覺,但家輝卻有種想做普通人的渴望,「受訓做領跑員後,我發現原來我係一個對社會有障礙嘅人士,因為係演員所以我平時出街係有好多麻煩,包括人哋嘅目光、偷拍,經常注意你做咩,令到我喺好長嘅時間變成一位宅男,冇咩事我都唔想出街。」他形容這問題是個人生關口,「人行到某階段總係有啲嘢要過,好彩我變成隱敝人士前畀佢哋(傷健人士)帶番我出嚟,對正常人生活又跨一大步。」