2020年12月1日 

都市專訪 甜蜜滿瀉 卓韻芝

2019-01-07 (週一)

卓韻芝與老公梁子賢拍拖數個月後隨即閃婚,已成為人妻的她在去年10月完成了兩場棟篤笑後,就與老公前往阿根廷度過足足一個月的蜜月之旅,今次《呃呃氹氹One Night Stand》Part Two「蜜月歸來版」她明言會加插更多新內容,向大家分享蜜月趣事!

撰文:卓妙燕|攝影:Sing|化妝:Anitalomakeup|髮型:Sam Pan @Muse Hair|場地:Cubus 貳捌|鳴謝:Barry@relaxdearhk

剛剛完成棟篤笑不久後,阿芝(卓韻芝)決定本月在伊館舉行《呃呃氹氹One Night Stand》Part Two!阿芝稱原來沒有這個打算,只想完騷後與老公去度蜜月,但很多朋友反映未夠喉,「好多人想知個婚禮誓詞係咩嚟,點解全部兄弟姊妹喊晒呢,我就冇講呢啲嘢,因為我婚禮前已經寫好晒啲稿,所以徇眾要求話想聽,又諗起度蜜月有好多趣事,所以新嗰個叫『蜜月歸來版』就會加多啲呢啲內容!」
蜜月多笑點
在上個棟篤笑中她曾說過生仔話題,但她卻指自己很怕生小朋友這個題目,「我覺得呢個題目係香港人普遍呢個年齡層都要考慮嘅問題,就係你相唔相信香港嘅前途,生小朋友你會覺得可唔可以畀到佢穩定嘅前途,佢喺香港咁嘅環境會唔會快樂呢?」除此之外,阿芝亦不諱言,這次棟篤笑會繼續將外婆「擺上台」,「阿婆教識我好多,我諗以前我係緊張大師,但我阿婆依家80幾、90歲,佢係連左右都唔識分,我又覺得佢人生係過得幾好!」
棟篤笑當然少不了二人蜜月之旅的趣事,度完蜜月後,令她明白到為何有這個傳統,「成日都話就算同好朋友一齊去旅行你都會現真身,然後可能會嗌交,度蜜月其實用嚟畀你兩個人好似困獸鬥咁一齊去玩,睇吓會唔會帶着矛盾去旅行。」阿芝又笑言最令她感到好笑的是當時酒店鋅盆漏水,身為Marvel忠實粉絲的丈夫為了看《復仇者聯盟4》預告片而置諸不理,「嗰下我直情將成個酒店嘅杯拎晒出嚟係度接,我叫老公入嚟睇吓,佢話唔得要睇埋條片先,之後我就喺廁所大叫:『復仇者聯盟係嚟拯救地球㗎,你依家連廁所都拯救唔到!』」
棟篤笑文化
今年剛好39歲結婚的阿芝坦言沒有想過會結婚,甚至到現在這刻仍感到難以置信,她笑說:「我覺得男仔唔結婚仲大鑊,女仔比較獨立,但男仔喜歡依賴,如果男仔冇家室個心會浮下浮下!我覺得結唔結婚都係際遇嘅問題,唔可以因為社會現象去扭曲。」經歷幾個月的婚姻生活,阿芝認為心態上有點不同,「拍拖會好容易諗想放棄段關係,但如果你願意同呢個人一齊,咁個基礎就係唔好分開,變咗大家嘅心態唔會諗住Quit份工。」
阿芝認為香港對棟篤笑文化非常陌生,很多人更指黃子華就是棟篤笑,她認為黃子華只是其中一種棟篤笑,「其實仲有好多唔同嘅方式,但香港人會將所有見到嘅後來者同黃子華去比較,用兩種唔同Style嘅演法去比較都幾唔公平。」對她來說,現今社會很適合發展棟篤笑,「棟篤笑好多時候嚟自悲劇,好多人都想有個發洩途徑可以爆鬧!另外,『女仔唔識講笑』更係一直存在嘅問題,女仔講笑係代表女仔發言,但男仔係代表人類發言,好唔明顯嘅性別歧視。」今次棟篤笑完結後,阿芝表示希望可以休息一段時間,讓自己沉澱片刻再繼續寫下去!