熱話 時尙 食玩 生活 旅遊 娛樂 親子 專欄 着數

都市專訪 目標一致 Dear Jane

2019-03-06 (週三) 08:00 上午

樂隊Dear Jane成軍15年,走過不少辛酸路,從地下樂隊到簽唱片公司,經歷成員轉換,出席活動來支持的歌迷卻寥寥可數,作為樂隊在樂壇上生存更是難上加難,但他們從沒有想過放棄,等了多年終於一圓紅館夢,3月正式殺入紅館!

撰文:卓妙燕
採訪:黎寶倫
攝影:ChaseK
髮型:Jamie Lee@JamieLeeHair
化妝:German Cheung

等了15年,Dear Jane首個紅館演唱會《Yours Sincerely Live 2019》終於在3月16至17日舉行!4子對於第一次在紅館舉辦演唱會都大感緊張、興奮,成員Howie說希望這次演出在視覺上能帶給大家另一番感受,他們更明言演唱會上會「玩火」,「導演話唔好淨係玩噴火柱因為太普通,玩火不如玩盡佢,所以變咗度度都有火!」

紅館夢終成真
出道多年現在才正式踏上紅館,對他們來說不會太遲,反而是剛剛好,Tim直言:「你去做每一樣嘢唔係去強求、強迫去發生呢啲嘢,我覺得有咁多人肯去一個地方聽我哋嘅歌就係呢個時候!」Howie也補充說雖然很想說遲了,但這個舞台的確是來得剛好,「今次係比較大型少少嘅演唱會,買飛前一個月嘅體會係好多粉絲話『等咗你哋好耐』,我寧願人哋話等咗你哋好耐都好過話『你咁快開紅館喇?』」
對於踏上紅館是否圓夢,他們卻認為紅館是一個里程碑讓他們繼續玩音樂,Tim說:「我覺得我哋嘅夢唔係停喺紅館開到演唱會咁簡單,其實畀到一個鼓勵同強心針我哋繼續去玩我哋嘅音樂。我哋咁多年都係抱住個心態係去任何場地表演嘅時候,個場地有幾多人想嚟聽,我哋就去嗰個Size嘅場地去唱畀佢哋聽。今次喺紅館開對我哋嚟講係非常開心,因為估唔到一個容納到咁多人嘅地方肯買飛嚟睇我哋,我哋一路都係抱住一個咁嘅心態去做每一場騷!」

用初心做音樂
Dear Jane近年來雖然獲得不少獎項,得到大批歌迷的支持,但原來他們也曾走過一段艱辛的路,甚至每月只靠公司所給的3,000元零用錢生活,「點都會辛苦吓,唔辛苦係冇意思,個個話夾Band好辛酸,其實個個出面做歌手都好辛酸!做任何嘢你想有成績、想去行得更遠都一定會好辛酸,最緊要係清楚自己做緊咩同自己鍾意做咩,所以大家唔會覺得辛酸,反而舒舒服服更唔似夾緊Band啦!」
2018年是Dear Jane大豐收的一年,Howie笑言最開心的是能在叱咤上首奪組合銀獎,「最開心係我哋終於可以喺呢個叱咤攞到銀獎,攞咗3年銅獎,咁就進步咗一級囉。」至於紅館夢成真後下一步想做甚麼?成員Jackal希望能去更多不同的地方演出,「近幾年去過好多地方,先發覺有好多講國語嘅歌迷走嚟同我哋影相,佢哋由我哋嘅歌、MV而鍾意我哋。我哋嘅目標唔係去紅館去邊度,而係好專心做我哋嘅音樂,咁就可以去唔同嘅地方演出,呢個係強化咗我哋嘅目標!」