2020年08月15日 

都市點評 人生障礙賽 鄧一君

2019-03-08

「好嘢嚟㗎!哈哈哈哈……」聽到這句話,想必許多80後心中都會響起無綫劇《美味天王》的主題曲,不經不覺該劇已播畢12年,片中的演員大部分已離開無綫,只有歐陽震華、宣萱間中回巢救亡,仍活躍圈中的古天樂則專心拍電影,其兄弟鄧一君亦一早轉行,由當年的「御用細佬、徒弟」搖身一變高級財務策劃師,最近更榮升老闆,在油麻地開設車仔麵檔「一君士多」!不論當年轉行,或是今天踏足飲食界,面對重重挑戰,鄧一君均抱住一個信念:「方法總比困難多。」難怪每個難關他都能夠衝破!

撰文:黎寶倫|攝影:ChaseK

「10幾年前離開娛樂圈都係心灰意冷,話晒都做咗10幾年,自己梗係想一路上,上到第一男主角、攞獎、搵好多錢咁,但始終都做唔到嗰個目標……」9歲開始於教育電視演出的鄧一君,93年憑電影《記得……香蕉成熟時》一片成名,其後轉投無綫拍了不少劇集,包括《美味天王》、《烈火雄心》、《金裝四大才子》等,惜天生童顏令戲路受局限,再加上性格被動,使演出機會逐漸流失。
轉行遭睇死
學早前被批不適合做Drama的蓋世寶話齋:「你唔夠假,太有性格!」一君當年亦身同感受,「做幕前梗要有幾副面具旁身,你太真又做唔到,除非你本身好有實力、靠自己可以搞好多嘢出嚟,或者屋企好有錢,咁你有後台、有人撐,其實可以好自我都得㗎,如果你冇呢啲資源嘅話就惟有妥協囉。我自己性格都係蝕底啲,即係唔係好搵人,人哋搵我又唔想出嚟見人,所以發展得唔係咁好。」

於是05年毅然退出娛樂圈,經朋友介紹下轉行做保險,「初初都有少數嘅聲音,話『做呢啲邊得㗎,你邊識呀,好難㗎!』實有人負面咁睇,但我唔會擺喺心,因為我唔係容易受人影響嘅人,我成日覺得方法總比困難多,困難挑戰一定有,但最緊要諗方法。」結果一做便超過10年,早年他更躍升為分行經理及高級財務策劃師,成就事業另一個高峰。不過已淡出幕前的一君,近來又頻頻於媒體上曝光,原來是為自己投資的首間車仔麵檔「一君士多」造勢。
開檔求開心
說到一君與飲食的淵源,怎能不提有份參演的經典無綫劇《美味天王》呢!「嗰時拍劇,睇住啲廚師點煮嘢食,先知原來背後有咁多藝術,跟住就開竅。直到幾年前,我喺跳蚤市場開車仔麵檔,嗰次諗住玩㗎咋,自己落手落腳淥麵,亂打亂撞,點知個個都讚好食,又話我有天分,叫我試吓開舖……」卒之兩年後,在油麻地碧街找到一個約110呎的舖位,「一君士多」亦於上月8日正式開張。

除了一貫的車仔麵餸外,該店陸續加入不同的懷舊小食,包括燒賣、咖喱魚蛋、頭抽腸粉等,務求做到「士多」一樣,包羅萬有。而早前趁農曆新年,一君更搞搞新意思推出「富貴車仔麵」、「蠔食車仔麵」,讓街坊以70蚊有找的蔗渣價錢,分別品嘗到足料的鮑魚、花膠、日本廣島蠔,「我同一般商家有少少唔同,因為我有正職,呢度主要係希望大家食得開心,人情味重啲嘅,所以我唔係主要為賺錢,係經營落去、生存到,贏咗口碑先,賺唔賺錢就日後嘅事囉。」
淡出執身彩
開業約一個月,店舖生意愈做愈好,兩款「新春限定」車仔麵更受歡迎得延長售賣。事業如此成功,應該也無悔離開娛樂圈了吧?「梗係冇後悔啦!直頭執番身彩,走得快呀!依家同以前係兩個世界,收入、開心程度、生活、際遇、健康,嘩!直頭差天共地!嗰時好多嘢都掹掹緊,你想買、想食、想過嘅生活,全部都做唔到,依家起碼累積到一定資產,能夠照顧身邊嘅家人,有自己事業、投資,其實已經好好。」
留戀演藝圈?不了!但倘若老友古天樂(古仔)開到聲,一君揚言必定一口答應,「冇得推㗎喎,以我同佢嘅交情、友情,佢開到聲梗係義不容辭、義無反顧啦!喺我事業最低潮嘅時候,佢鼓勵我、請我食飯、生活上幫我,又介紹機會、人際網絡畀我,你講得出嘅都有,好有義氣!」據說,當年古仔是其首名保險客,那麼如何報答對方呢?「煮碗靚麵畀佢食!物輕情意重呀,哈哈!」一君笑道,他又希望日後再開分店,將這份滋味帶到各區。

一君士多
電話:9619 6877
地址:油麻地碧街39號D舖
營業時間:星期一至六
12:00-19:00