2020年08月15日 

都市點評 陳貝兒 得閒找素

2019-02-01

身邊愈來愈多朋友說要戒吃牛肉,好友A說想為家人祈福,友人B說想皮膚更好,朋友C則說是為健康着想。茹素看似只是個人的事,但早於大學時期已開始茹素的陳貝兒,背後的原因卻不是只為了自己。「因為有堂老師教環保講低碳,講到有咩方法可以為地球出一分力,原來食素可以減碳㗎!」為了愛護地球,促使她多年一直為綠色文化發聲,近年將演藝事業版圖延伸至餐飲界開設Green Common,吸引更多人加入找「素」行列。

撰文:甘偉丁|攝影:ChaseK
Wardrobe:ETRO
Jewelry: Atelierswarovski

過往提起吃素,不少人停留在傳統的中式齋菜如酸齋及芋頭魚等。但近年素食全面變奏,相信多得Green Common的出現,成功將這個悶局扭轉,將常見的漢堡包、年糕及餃子等變成素食,引發素食新潮。「我哋好想研發一啲有趣、唔同元素嘅素食,等大家可以實踐Green Lifestyle。」陳貝兒說。

推動綠色文化
不知貝兒茹素多年,會否有一刻衝動想再吃肉?「真係冇,除咗環保意識推動我去食素外,仲有因為對小動物嘅愛護。未轉食素之前乜都食,後尾上網睇咗好多屠房嘅片段,嗰碟看似好美味嘅牛扒同豬扒,背後係咩故事呢?睇完覺得唔應該再傷害動物。」平時日常工作繁忙食無定時,要吃素也不易。「要食得聰明,需要吸收好多蛋白質,好似大豆同豆腐都有大量嘅蛋白質可以攝取,唔可以一下子就淨食烚菜,太清其實好唔健康。」

有甚麼建議給予素食初哥?「慢慢咁去令自己身體接受,喺Green Monday初期,有去好多學校同機構推廣,因為周末大家都好多應酬,大魚大肉後,畀自己由藍色星期一變成綠色星期一,會有朝氣啲,再慢慢加重個比率。好多朋友聽完都好感動就化為行動,話第二日就要戒晒肉!但咁樣我反而唔鼓勵,因為要身體適應,唔可以一下子就戒晒。」貝兒還認為需要了解自己身體並循序漸進。「香港人好多首先會戒牛,之後就會係4隻腳嘅羊同豬、兩隻腳嘅雞同鵝都唔食,之後就會戒埋有樣嘅魚,最後可能只係淨番貝殼類。」
出全新純素豬肉
為推動綠色生活,貝兒不遺餘力,更與Green Monday 的Founder David Yeung開設Green Common。「我哋係好朋友,佢食素都食咗好耐日子,傾開就話不如搞個社企,大家知道點解要食素後,就要付諸實行,所以就有實體店嘅出現,畀大家買到嘢喺屋企煮,由第一間喺灣仔嘅舖頭,開始慢慢發展到依家已經有7間。」

去年推出的Omnipork新豬肉,與城中各大餐廳聯乘,炮製小籠包及生煎包等打響名堂。「迴響比預期中好,好開心見到大家好關注健康問題。」與其他素肉有甚麼不同?「呢個肉係純素,由我哋自己研發,因為豬肉成日都會喺餐單上用得到。之前我哋都有推出過Beyond Meat,嗰個係牛肉為主,今次呢個豬肉可以有更多變化,做餃子、蘿蔔糕入面嘅配料,整肉餅、麻婆豆腐、煎釀三寶等,好大嘅變奏,完全係針對亞洲人口味出發。」
每人對食素都有不同程度的要求,至於貝兒表示自己是隨緣的素食者。「碟邊素都OK嘅,即係一碟餸入面,有菜有肉,我唔掂啲肉就得,因為有啲人就連隻鑊炒過肉都唔得㗎,所以我覺得自己去衡量啦。」
素食者各自修行
但其實食素不少人會認為是齋口不齋心,因不少素食都是「扮肉食」來烹製菜式。「我覺得食素都有唔同程度,但如果要做到好奉行或者心靈上都要做一個極端嘅素食者,當然你都有自己嘅方法Fulfil 呢樣嘢,但其實我哋係希望吸納更多人去加入素食行列。甚至乎令到食緊肉嘅人都覺得食素係件做得到嘅嘢,所以我哋門檻一向都係低嘅,可以Baby step to go green。咁齋口定齋心就要各自去修行啦!我哋打開門絕對係會畀大家嘗試,不如食少啲肉啦,等佢哋覺得食素係一件接受到嘅事先!」
雖然貝兒沒有參與設計餐廳的菜式,但反而為菜式取名。「好似Omnipork叫新豬肉,畀大家覺得有啲新鮮感。」Kind Kitchen與其他Green Common店有甚麼分別?「呢間係Vegan,即係蛋同奶都戒埋!但反應幾好同生意幾好,證明香港有班朋友真係好有要求。」

Kind Kitchen by Green Common
地址:中環德輔道中173號Nan Fung Place 1樓1號舖
電話:2110 0055|營業時間:11:30-22:00