熱話 時尙 食玩 生活 旅遊 娛樂 親子 專欄 着數

陶耀輝 Alux To##兩E在Fb發生呃Like戰的一個晚上

2019-09-20 (週五) 08:00 上午

朋友送了兩張金鐘6星酒店自助晚餐25% off的Coupon畀Eva,雖然折咗都要8百幾蚊,Eva決定豪一次,就約了閨蜜Elaine一齊去食個痛快,難得原來Elaine都好想試下酒店最出名嘅AAA和牛。放咗工,大家去到差不多8點,全場爆滿,不過秩序井然,淨食環境都同尖東嗰啲好唔同囉 !

痴線,生蠔都有6種,龍蝦、帶子、長腳蟹、魚子醬鵝肝從沒有間斷。影相是常識吧。Elaine 食咗4 set 和牛面不改容,Eva 就狂飲法國紅酒,面有少少紅,顯得有點可愛。

回到家11點幾,由於飲多了,Eva冇換衫就瞓咗一陣,沖涼後清醒少少已經凌晨一點半。拿起手機睇睇,一個WhatsApp message都冇,反而Facebook有Elaine notice,仲Tag咗Eva。原來Elaine post 咗幾張buffet 相,又影得幾靚,Eva 都Like咗,共有22個Like。Eva也施施然用咗15分鐘搵相,P咗一陣,post 上自己FB。立即有12個Like。Eva 感到滿意,有30個Like 就瞓,畢竟食自助餐需要花不少氣力。過了10分鐘,只多了5個Like⋯⋯Elaine佢竟然去到43個??? 最大問題係Elaine點解唔Like 返我? 死婆,我益你食好嘢,忘恩負義,唔通咁快瞓咗!唔係喎,嘩,佢有回Comment 喎,Michael 問那些是否北海道和牛,因為佢之前食是用澳洲牛。Elaine 回:「對呀,北海道,但係自己只係食咗少少,怕肥呀。」 Michael又問點解突然會去呢間酒店食Buffet?「我朋友生日,咪去食飯跟佢慶祝,朋友喜歡食和牛嘛。」 咁你都講得出? Michael都識我㗎,你又唔提我?邊個生日呀?邊個鍾意食和牛?仲有,唔係我有Coupon 你捨得畀錢去食?話咁快,Elaine 個post已經升到有83個Like。天呀,點解我都仲係得21個Like? 原來Elaine 個Post Tag 咗Michael,所以Michael有畀Comment,佢仲Tag咗酒店同北海道和牛⋯⋯而我就只是Post 相,眼瞓嘛,打少咗幾隻字真係少咗好多Like。我都要自己Comment 下先,「法國Merlot 跟Spanish iberico ham 真是絕配」,立即多了兩個Like。但是Elaine 已經上升到120個。阿娟⋯⋯個表姊仲回咗一段介紹呢個Buffet嘅Youtube片,OMG,呢個Comment 已經有25 個Like,激氣。我哋朋友數目都係差不多⋯⋯點解我會咁少Like?

唔得,再係咁天光我都去唔到30個Like,我要edit 個Post,唔懶得,要寫多啲啦!哎,點解只可以加字,唔可以加相?我最Killer嗰張微醉相唔加唔得! 唯有Delete 呢個Post,再出一個新Post。搞咗十分鐘,Eva 終於完成一個自己覺得原美呃Like Post。時為2:30 am。過了一個小時,呢個Post 共有4個Like。 一晚間FB 不知拆散了幾多對閨蜜,Eva 在迷茫中瞓着了。

陶耀輝 Alux To
筆者畢業於香港理工大學設計系,早在1997年投入網絡世界,紅褲子出身,善於將科技轉為生意,為多間網絡公司決策人。
applieddigitalism@gmail.com