2020年08月4日 
2019-05-03


零食大王「跑」過界 辦牛奶妹慈善跑


「人人都想做慈善活動,唔通人人都做得成咩!」今時今日要將慈善活動做得有聲有色,單靠感人台詞未必吸引到人參與,反而要搞搞新意思,諗出一啲特別橋段嚟吸睛!早排,人稱零食大王嘅橫丁老闆黃偉鴻(Ellis)就以日本著名牛奶妹做主題,喺大埔白石角舉辦慈善賽跑「Run In 橫丁2019」。Ellis話,兩年前第一次舉辦這慈善跑,未開跑,自己已經要跑數,皆因喺無乜特色之下,報名反應不佳,半年時間只有數百人參與!
今年汲取經驗,利用牛奶妹「一齊跑」,短短兩個月就吸引近三千人報名。活動當日,大家着上牛奶妹T恤,一邊跑一邊影相,完成賽事後仲有牛奶妹獎牌,大人小朋友都相當興奮!加上Ellis係中華廠商聯合會會董,一呼百應下,其他會董及會員都踴躍參加,為仁濟醫院及香港福建希望工程(輔助貧困學生基金)籌募經費。
「一起變老」活動 月中首辦
講起慈善,5月13日亦會有另一個幾有趣嘅慈善活動,Candy都打算參加!由GP33主辦嘅《愛要及時》之「透視未來,珍惜現在」大型活動暨MegaBox「一起變老」全城體驗活動,就是畀大眾一個機會同心愛嘅人一齊超越時間,體驗「年老」,藉此明白「珍惜現在」嘅重要性。
當日活動將有銀髮匯演、藝人表演、星級化妝表演及「一起變老」全城體驗,相信到時大家一齊化老妝,表達愛的宣言,必定又搞笑又感人!

中環公關
Candy,金融界公關,
喜歡發掘商界趣事秘聞。