2020年08月4日 
2019-09-19


46歲蔡少芬宣布封肚 拒做「多產」藝人


懷有第3胎的蔡少芬前日46歲生日,出席經理人公司新辦公室開幕時,獲老公張晉及好友送上生日驚喜,席間朱茵祝她成為「多產」藝人,蔡少芬即落閘嗌「封肚」,更向同場的鄧麗欣催婚!

已有兩女的蔡少芬(Ada)於今年6月公布陀第3胎,前日(17日)她46歲生日,適逢所屬經理人公司新辦公室開幕,旗下藝人包括Ada丈夫張晉、朱茵、鄧麗欣(Stephy)、原子鏸和歐倩怡等一齊為她慶生,其間張晉更送上46支玫瑰、粉紅蛋糕和親手撰寫的生日卡,逗得壽星女笑逐顏開,仲情不自禁向老公送吻,非常甜蜜!

席上,朱茵又鼓勵Ada再生多個,成為「多產」藝人,惟Ada聽罷即耍手擰頭笑謂:「啋過你!呢啲『多產』我唔要,工作嗰啲『多產』我就要。大家咁話,你(朱茵)追多個先,Stephy就快啲結婚啦!」她更直言3個已經夠晒數:「我就夠喇,冇手再抱,老公要留番一隻手攬我,所以我『封肚』。」

願望生個健康B

問到張晉可有送禮物?Ada說:「對上一次收禮物已經係聖誕節,當時佢送咗個手袋畀我,其實好感恩,我哋兩個都冇乜物質缺乏,買禮物都係為咗氹吓對方。」並謂前晚撇低兩位千金與老公二人世界食飯慶祝,她續道:「有朋友送咗一間酒店房畀我哋,所以我要撇低兩個女,好好去享受,佢哋仲叫我玩得開心啲,佢哋兩、三個星期前已經送咗生日禮物畀我,佢哋將自己鍾意嘅玩具放落鞋盒送畀我,但轉個頭就攞走晒。」至於生日願望,Ada表示最緊要是平平安安生個健康BB。