人氣組合ERROR因193寸無綫「收視得幾百部電視機」後爆紅，甚至連美加都有404（ERROR粉絲名稱），ERROR成員何啟華（阿Dee）最近接受美國華語節目《偶像名人堂》越洋訪問，他說參加《全民造星》是因為很想成為電影演員：「我曾經拍過YouTube Channel，由嗰陣時開始就好想參加演員嘅工作，電影、電視劇個方面嘅嘢，之後霉咗好幾年，點解霉？因為冇曝光，對我嚟講《全民造星》叫做無路可揀，嗰陣時同另外兩位兄弟Alton（王智德）同Lokman（楊樂文），大家都跳舞識咗好多年，大家都話嚟到呢個年紀，有得玩不如大膽啲一齊試吓，我想清楚話俾人聽我哋係可以做戲，呢個係我把握得好好嘅機會！」

因為阿Dee曾經參加內地火紅節目《這就是街舞》第一季，但他沒有把握機會，所以有深刻教訓：「當時同隊友一齊玩，海選過後，當時評判係羅志祥，佢話：『我淨係留你啦，我想你Battle多一round，爭入席位！』當時我兩個隊友foul咗，得番我一個，我真係好冇心情跳落去，結果我Hea咗去，我返到屋企就好後悔，我阿媽行出嚟問：『比賽點呀？』我答唔到佢，因為我知道自己未盡力就放棄咗，呢樣嘢係我最深刻嘅教訓 ！」提到能夠在參加《全民造星》時和Alton、Lokman完成去美國LA受訓的心願，他坦言：「好開心，如果有一日我要離開呢個世界，可以行一轉人生走馬燈，我會行番去嗰一幕！」

阿Dee說從來沒有想過自己會有個組合，當知道有ERROR時相當興奮：「我哋四個行出嚟，個身形已經話俾大家知係error，就出咗事，係好開心！」身為副隊長的阿Dee搞笑說：「我嘅職責係協助成員集體欺凌隊長！」他說從來沒想過ERROR紅得起：「其實紅係因為193嘅言論，大家翻睇我哋之前嘅節目，之後接住播《ERROR自肥企画》 ，擁有呢個成績好幸運！」

主持問阿Dee如果ERROR增加成員要甚麼條件，他爆笑說：「首先唔可以係男人，唔該係女人，最好係靚女，仲要有咁靚得咁靚，我哋做草佢做花，我諗呢個係最着數！」之後他又說：「我諗四個成員都夠，唔想影衰其他人，最衰嘅等我哋食住先！如果要加就百幾二百個，搞個邪教出來，我哋四個係教主，你哋供奉我！」

談及經理人花姐，阿Dee說：「第一印象都係高高在上、好惡，你會有種唔敢接近佢嘅感覺，寧願激嬲自己阿媽都唔好激嬲花姐，但後來就見到其實所有女人，都有媽媽嘅心願同心腸喺入面，雖然佢對你嚴謹，但佢熟咗你認識你之後，係好Take care人嘅人，而佢自己好辛苦，我知佢好辛苦！」

談及早前和影帝劉德華、梁朝偉拍電影《金手指》，阿Dee說：「 學到超多嘢同好開心，對我嚟講係一個夢，好似發緊夢，真係同嗰個級數，一班專業演員一齊做戲，我係冇機會同劉生合作，因為冇對手戲，我同梁生多啲對手戲，仲有另一位影帝華哥（任達華），我睇到佢哋嗰種專業！」