「2021年度叱咤樂壇流行榜頒獎典禮」在亞洲國際博覽館舉行，開始時歌手逐一出場，當MIRROR出場時，歡呼聲不斷。今年頒獎速度相當急速，很多得獎歌手未說感言便要唱歌。第一個頒的獎項是「叱咤樂壇生力軍女歌手」，銅獎由Chantel（姚焯菲）奪得，她說：「多謝所有觀眾朋友，好多謝屋企人，我記得爹哋媽咪同我講讀書要俾心機！」銀獎是炎明熹（Gigi）：「多謝一直支持愛惜我嘅人！」金獎由張蔓姿（Gigi）奪得：「多謝屋企人爹哋媽咪家姐，多謝你哋100%俾愛我！」「叱咤樂壇生力軍組合」銅獎由P1X3L奪得，銀獎是MC $oHo & KidNey：「我想多謝嘅人寫晒喺手度，特別鳴謝一直想我哋紅嘅人，多謝大家！」金獎是石山街。

「叱咤樂壇生力軍男歌手」銅獎是曾比特（Mike），銀獎是Edan（呂爵安），他說：「多謝Mirror所有兄弟，多謝爵屎，多謝屋企人，特別係阿妹，2021年絕對係E先生連環幸運事件，得到好多機會，同時清楚自己做好多嘢都唔夠叻唔夠好，希望我會繼續努力，希望有朝一日大家會真真正正認同我哋！」金獎是張天賦（MC），他高呼：「老竇我得咗喇！多謝我嘅粉絲『賦二代』，新一年我希望可以高啲，我改變唔到身高，我希望可以再創新高，我減唔到肥，我改變唔到體重，但多謝你睇重！」

張敬軒之後奪得「叱咤樂壇至尊唱片大獎」，他表示多謝大家一直支持，多謝香港人。「叱咤樂壇組合」銅獎由Dear Jane奪得，銀獎是MIRROR，Lokman說：「攞到呢個獎多謝在場咁多位，多謝電視機前咁多位，因為好多時係你成就我哋，你俾咗好多力量同愛我哋，感激！」金獎則由C AllStar奪得。

「叱咤樂壇女歌手」銅獎是林欣彤，銀獎黃妍，金獎由鄭欣宜奪得，她同時奪得「叱咤樂壇我最喜愛的女歌手」，她激動說：「其實我自己一路都好耿耿於懷一個名稱，就係歌手鄭欣宜，唔知點解大家報道我嘅時候都係寫藝人鄭欣宜，我咩都願意做，為咗換取更多機會唱歌，連我入手術室都拍埋，係你哋俾無限嘅時間同耐性我，令我成為今日嘅鄭欣宜，希望由今日開始，叫我做香港歌手鄭欣宜！」全場拍掌！

「叱咤樂壇男歌手」銅獎由馮允謙奪得，銀獎是林家謙，金獎由張敬軒奪得，他說：「多謝現場觀眾同埋個歌迷，多謝你陪我行咗咁多年，多謝我廣州老家嘅屋企人同粉絲，自己行咗20年呢條路，希望去回饋樂壇，由今年開始我會低調做人，高調做事，將多啲時間放喺音樂！ 」

MIRROR今晚大豐收，除了Edan奪「叱咤樂壇生力軍男歌手」銀獎外，「專業推介．叱咤十大」10大有3首由MIRROR同成員奪得，包括Anson Lo（盧瀚霆）憑《Megahit》奪第9位， Jer（柳應廷）的《狂人日記》奪第6位， MIRROR憑《Boss》奪第2位，之後MIRROR奪得「叱咤樂壇我最喜愛的組合」。

「叱咤樂壇我最喜愛的男歌手」則由姜濤蟬聯奪得，他說：「 要多謝嘅人太多，喺短短10秒講唔晒，我多謝晒所有人，我想有啲時間同香港呢個地方講，我哋曾經許下一個諾言，今年好多人覺得我唔知自己講緊啲乜，我喺呢個地方我有信心講，我哋香港一定係亞洲第一！」而「叱咤樂壇我最喜愛的歌曲」亦由姜濤的《Dear My Friend,》奪得，領獎時姜濤相當激動，只說：「 送俾你！」將獎項送給上天的故友，他唱歌時泣不成聲，更一度背向鏡頭，最後由工作人員帶他返入後台，場面感動又傷感！

專業推介．叱咤十大

第1位 《Ciao》 RubberBand
第2位 《Boss》 MIRROR
第3位 《俏郎君》張敬軒
第4位 《多喝水》鄭融
第5位 《神奇的糊塗魔藥》林家謙
第6位 《狂人日記》柳應廷
第7位 《集合吧！地球保衛隊》C AllStar
第8位 《風的形狀》岑寧兒
第9位 《Megahit》 盧瀚霆
第10位 《荊棘海》 泳兒