新一代姐姐殺手、23歲的魏浚笙（Jeffrey），前年因參加了Viu TV真人騷節目《調教你男朋友》爆紅，之後和MIRROR成員Edan（呂爵安）拍節目《膠戰》、《膠戰2》、青春游水劇《i.SWIM》等，憑着混血靚仔外形狂吸咖啡豆（粉絲名稱），前途無限。Jeffrey近日接受網上平台盒子BOX channel節目《月傾會》訪問，主持林柏希問他那個稱呼最受落，Jeffrey說現在最多人叫他「煨Sir」：「依家叫煨Sir，因為《膠戰》第一季，有一個叫咩煨番薯，我講咗餵蕃薯，所以依家啲人會叫我煨Sir！」煨字和餵字，煨Sir說懂得分的，還即場教大家怎樣寫「煨」字，很搞笑！

林柏希叫Jeffrey自評靚仔指數，Jeffrey竟然說：「真心，我覺得自己唔紅，咩叫紅呢？紅嘅意思係MIRROR、國際例子BIGBANG呀、BLACKPINK呀！碧咸我覺得好靚仔，吳尊我都覺得好靚仔，吳彥祖又好靚仔，呢啲先係高分囉，我呢啲唔好講喇，唔係嗰個level！」最後Jeffrey給自己68分靚仔。

不要以為靚仔沒有煩惱，Jeffrey說自己原來有少少抑鬱，「我有時諗嘢會好負面，我會諗到好worst，但係我會好快唔記得咗！嗰陣疫情開始好嚴重嘅時候，我會忽然間喊，有時女朋友忽然間咳，我都會好擔心，我就覺得大鑊喇，係咪發燒呢？跟住我就好驚！」

拍《iSWIM》爆Phoebus收埋練大隻

早前Jeffrey拍完第一次擔正的Viu劇集《iSWIM》，同場還有Edan、Stanley和Phoebus等男神，同場較勁有沒有特別操fit？「我梗係唔輸蝕啦，我每日都操緊呀，我又唔會扮嘢嘅！」哪個收收埋埋自私操？「Phoebus（吳啟洋）好笑，Stanley（邱士縉）有同佢話：『喂，Phoebus，你好似要操一操。』佢話個角色唔使肌肉，點知過咗一個月之後，佢又大隻咗喎，臨roll機又喺度操操操喎，跟住Stanley就話：『又話唔操，扮咩啫！』」

小時候覺得邱淑貞好靚

Edan曾經嘲笑過Jeffrey現形是「咖啡豆」，Jeffrey說：「其實我又真係唔係好介意呢啲，但係你話『咖啡豆』又好難真係『咖啡豆』喎，咖啡豆係咁細粒㗎喎！你話使唔使澄清，我又覺得冇乜呢個必要！」問他拍《iSWIM》時誰最「雄偉」？Jeffrey很有自信說：「目測就真係冇乜特別勁喎，我又唔覺得我輸蝕喎，差唔多啦，大家Asian差唔多㗎啫！」Jeffrey還自爆收過男fans下體照：「又唔係好多張，兩三張囉！block咗佢囉，哈哈哈，有乜好睇啫，我都有啦！」至於男神心目中誰是真女神呢？Jeffrey想了一會說：「我細個睇《海派甜心》我會好鍾意楊丞琳！」又說《超級學校霸王》入面的邱淑貞很美！

最冧送99支玫瑰

Jeffrey沒有偶像包袱，一早公開有個拍拖多年的姊弟戀女友Evelyn，現在Evelyn還成為他的經理人，日對夜對，Jeffrey說一點也不悶：「完全冇悶過，有時我拍劇集，佢太多嘢處理都唔會跟，我一做完嘢，返到嚟見到佢，我就好放鬆、好開心！」問他做過最冧的事，他說：「忽然間情人節送咗99支玫瑰花俾佢囉，嗰時都覺得好威！」Jeffrey還透露心聲：「結婚冧啲，結婚啦！我一定結婚，我好想快啲結婚！」男神正式封盤喇！一直都很喜歡唱歌的Jeffrey，即場清唱偶像林宥嘉的《心酸》，獨家深情冧唱，「咖啡豆」絕對要珍藏呀！