雪姨（Sharon，容可兒）是當紅YouTuber，人稱「富貴KOL」，而她今日所得是靠自己白手興家。雪姨小時候和媽媽、公公婆婆住在柴灣公屋，6歲時父母離異，自此同媽媽相依為命，長大後利用積蓄投資股票起家，如今坐擁8間公司，還與陳凱琳合作做生意，她勁到一年內買入兩間豪宅，包括一炮過付清950多萬買入才女林燕妮半山故居送給媽媽，之後又以逾3千萬買實用面積達2,400呎的北角半山豪宅，雪姨曾拍片騷豪宅說：「本年度最無悔嘅投資！」令網民高呼：「雪姨，我不想努力了！」

近日雪姨上楊詩敏（蝦頭）和連詩雅主持的網台ChillGOOD TV節目《絲打圍爐》做嘉賓，大談擇偶條件，主持問她如果有男士很愛她但沒有錢可以嗎？雪姨說︰「如果佢冇乜錢，但佢好愛我，其實我覺得真係好OK嘅。（ 如果要養男友呢？）咁就真係未必得，我揀得佢做男朋友，一定要喺某一個範疇我好欣賞佢，好有才華，或者係睇準佢嘅才華，不如我入股落佢間公司度，幫佢將間公司搞大佢！」兩位主持即大笑，雪姨直言︰「其實我哋呢啲，真係好易氹好易追！」

主持再問雪姨，一個男人很有錢但又肥又醜，另一個靚仔但沒有錢，怎樣選擇？雪姨不用想便說︰「梗係要冇錢啦，#靚仔同body係最緊要！」之後玩遊戲，雪姨要答理想對像的身高、年齡、愛好、性格和每年收入，雪姨最喜歡藝術型男生，理想身高175cm，25至26歲，性格外冷內熱。連詩雅問如果男方可以自立，但住劏房可不可以？雪姨說︰「如果佢真係住劏房，但係佢真係好靚仔，body好好，算啦！我租俾佢啦！」蝦頭爆笑說︰「靚仔又有Body，依家仲要收佢租，雪姨贏晒，佢嘅生意頭腦真係好勁！」之後雪姨說：「淨係幫我煮飯，唔使交租啦，喺屋企照顧我啦！」又說：「我會同佢講：『哎喲，陰公豬，咁大個仔仲住劏房，哎喲，慘慘 ，好啦好啦，過嚟跟雪姨啦！』」超爆笑！