娛樂

越洋專訪 處男作《IT狗》被花姐讚好 曾因發展步伐慢唔開心 Frankie:努力咗可能公司未睇到

33歲的皮皮Frankie(陳瑞輝 )憑360度零死角,被封為MIRROR顏值擔當,但為人低調,曾被經理人花姐指他存在感不高,不過近日他在處男作《IT狗》飾演經常放負的Never,便被網民大讚可愛又爆笑,令人驚喜! 最近他接受美國華語節目《偶像名人堂》越洋訪問,Frankie大爆花姐都有讚他做得好,令他放下心頭大石:「我都試過做主持、綜藝同拍劇,我喺出道之前,我定俾自己個位就係想好試吓戲劇,今次拍完《IT狗》之後,我問過花姐,花姐都覺得『你做得幾好喎』,好彩啫(鬆一口氣),因為我係比較鍾意做戲,我覺得做戲係繼跳舞之後,另一樣俾我擺到自己多啲唔同方面出嚟嘅嘢,我覺得做戲做得舒服,同埋可以發展落去!」

Frankie
Frankie(陳瑞輝 )最近接受美國華語節目《偶像名人堂》越洋訪問。
Frankie
近日他在處男作《IT狗》飾演經常放負的Never,便被網民大讚可愛又爆笑,令人驚喜!
Frankie
Frankie大爆花姐都有讚他做得好,令他放下心頭大石。
Frankie
Frankie說:「我覺得做戲做得舒服,同埋可以發展落去!」

當主持提到節目《調教你MIRROR》請了麥子樂分享做演員的心態時,Frankie坦言曾經因發展步伐比其他成員慢而不開心:「其實我哋MIRROR每個人都有唔同嘅發展,有啲比較行得快,有啲行得慢少少。因為我性格嘅問題,我都要爭取多啲嘢嘅時候,可能力度唔夠大,自己久而久之會有少少唔開心嘅係,我努力咗可能公司未睇到。其實自己嗰吓出道咗差不多兩年,覺得自己嘅步伐可能比其他MIRROR成員慢少少,自己都有反思有唔開心,但聽到麥子樂講,用佢同我比較,其實真係蚊同牛比,佢嘅等待佢嘅付出,同佢所承受嘅能耐大過我哋好多,聽麥子樂講都聽到佢keep住好有熱誠做自己嘅嘢,令我確信我哋只不過有時有少少攰,但個熱情仲喺度,提醒返我哋其實仲有熱誠。」

Frankie
主持提到節目《調教你MIRROR》請了麥子樂(左)分享做演員的心態時,Frankie坦言曾經因發展步伐比其他成員慢而不開心。
Frankie
Frankie坦言:「聽麥子樂講都聽到佢keep住好有熱誠做自己嘅嘢,令我確信我哋只不過有時有少少攰,但個熱情仲喺度,提醒返我哋其實仲有熱誠。」

問Frankie想不想出Solo歌,他說:「其實我自己嘅目標都係想出一首歌,但我有另一個問題就係,我仲未過到自己個關,我對自己嘅Standard都好高,呢個係我冇乜信心嘅其中一個問題,但我已經克服緊,但我同隊有阿Jer同Ian喺度,咁勁先出Solo,所以自己要沉澱番少少,應該假以時日都會有一首,所以冇刻意好大要求話我想要出Solo,我冇咁樣諗,依家喺戲劇嗰方面嘅安排都OK呀,繼續去先,唱歌就慢慢繼續自己進步,要等一等!」

Frankie 在《全民造星》比賽時落淚一幕,被網民稱為「神之眼淚」,唯美又經典,主持問如果出Solo想跳唱還是唱有情感的歌?他說:「我應該會係分享情感類別,我唔需要做好勁嘅跳唱,我由《全民造星》開始,唔知點解我嗰滴眼淚令咁多觀眾有同感,我就發覺其實我嘅感情好影響到觀眾,如果做Solo我想有啲意思,有啲可以share俾觀眾嘅嘢!」

Frankie
Frankie 在《全民造星》比賽時落淚一幕,被網民稱為「神之眼淚」,唯美又經典。

Frankie 除了靚仔,還很專一長情,他和任職Dancer的女友已經拍拖十多年,兩人有甚麼相處之道?「我同女朋友拍拖初期,我係嗌交嗌到不得了嗰啲人,我係會想將所有嘢挖晒出嚟講,有啲情侶係接受唔到呢套,但我哋OK嘅,我哋乜都挖晒出嚟,之後就係生活,生活到可能大時大節,聖誕節嗰啲,因為做騷約唔到出嚟都冇乜嘢,好睇得開,周年紀念嗰啲就算唔慶祝唔食飯都OK,就係因為我哋都擺大家喺生活入面,有啲咩關懷呀,譬如我放工之後經過間舖佢好鍾意食嘅就會買,唔理咩日子,好多呢啲生活點滴累積,就穩固好多,我發現原來乜都撩出嚟講係幾好嘅!」

Frankie
Frankie 除了靚仔,還很專一長情,他和任職Dancer的女友已經拍拖十多年。

Frankie工作繁忙,經常陪不到女友和家人,他們會否不開心?「初初係有嘅,依家屋企人同女朋友都習慣咗,始終工作上成日有壓力,令自己返屋企會好唔爭氣咁樣發脾氣,發完之後第二日死死氣同佢哋講唔好意思,大家都好明白。最唔開心就係夜晚返到嚟,有時會嘈親屋企人,呢個係冇辦法避免屋企人要食嘅一樣嘢,但好彩佢哋好愛我好,體諒埋呢樣嘢,女朋友都係,其實最近呢一兩個月都冇乜見過一兩次面,但大家都知道大家做緊啲咩,最緊要係大家都為大家奮鬥緊!」

Frankie
Frankie說:「其實最近呢一兩個月都冇乜見過一兩次面,但大家都知道大家做緊啲咩,最緊要係大家都為大家奮鬥緊!」