娛樂

曾做地盤 拍戲被鬧樣衰 憑《IT狗》苦盡甘來 岑珈其:夢想演戲演到老

憑《IT狗》、《膠戰S2》人氣急升的岑珈其,近日接受網上平台BOX channel節目《月傾會》訪問,星級主持林柏希首先恭喜《IT狗》大獲好評。岑珈其說:「多謝觀眾嘅!其實當初都有啲擔心,因為話晒係喜劇為主,so far觀眾都鍾意!」

 岑珈其
岑珈其憑《IT狗》人氣急升。
 岑珈其
岑珈其有份主持的《膠戰S2》大受歡迎!

08年由《烈日當空》入行的岑珈其,演慣學生,現已是31歲人夫兼爸爸的他說:「我30歲嘅時候就想定一個目標,希望之後都唔再演學生!」終憑《IT狗》如願轉型成功!如果可以,岑珈其說想演戲演一世:「我已經將演員定咗為自己一個夢想、一個終身職業。如果條件容許,我想演戲演到老!我一定唔係高大靚仔,我憑咩呢?所以細個好冇自信,亦都唔相信自己會成功,但係呢一個係我最鍾意嘅夢想,我唔想錯過令到自己後悔!」

岑珈其
岑珈其已是人夫兼爸爸。

曾經做過跟車、司機、地盤、sales、水吧、磨雲石、地產仔、保險仔;又做過燒烤場工作、做過冷氣技師……岑珈其慶幸自己身為家中孻仔,不用為家擔煩惱,更多得老婆從來沒有給予壓力:「我要好多謝太太,佢真係冇俾過任何壓力我。我識佢嘅時候,佢唔知我係演員,嗰時真係一啲都唔出名,其實依家都唔係話好出名!」

岑珈其
岑珈其曾做過跟車、司機、地盤、sales、水吧、磨雲石、地產仔、保險仔等。

曾經對余香凝動心

問到最想演的角色,岑珈其話最想挑戰《西遊記》孫悟空和《鹿鼎記》韋小寶。林柏希即場叫岑珈其擇選數位女星做韋小寶老婆,岑珈其心目中人選有:「噏啲未合作過或者唔係合作過好多次㗎啦,我覺得阿Jace陳凱詠啦,我覺得佢係過癮嘅,同佢合作過一次港台,我覺得都幾適合再合作;我覺得Jennifer(余香凝)一定要有,因為實在太有默契,同佢嘅身高差太好笑;阿談談善言,因為冇乜機會同佢合作好多,然後其實Hanna陳漢娜都幾好!」

岑珈其
岑珈其坦言曾經對余香凝動心。

去到《大膽答 冇膽食》環節,今次有特別嘉賓亂入,就是跟岑珈其在《IT狗》同場的Johnny仔。Johnny仔真名叫鄧子超,家人在灣仔開餐廳,日日在餐廳坐鎮的他,今次特別預備了勁辣口水雞和麻辣雞翼做懲罰食物!Johnny仔還客串問一題,他問岑珈其跟這麼多女星合作過,有誰曾令他動心,岑珈其最初說因為實在太愛老婆,兼且每次都可以抽離,之後他說:「如果要計呀,我諗係Jennifer(余香凝)囉!佢係一個好善良,好動又大癲大肺,點解我咁講呢,因為我老婆都係呢啲性格!」

岑珈其
Johnny仔的家人在灣仔開餐廳,今次特別預備了勁辣口水雞和麻辣雞翼做懲罰食物!

Edan玩遊戲太奸

除了Johnny仔,有份演出《IT狗》和《膠戰》的男神Jeffrey魏浚笙都有份亂入,Jeffrey特意拍了短片問岑珈其。曾經聯同梁曉豐、林耀聲和黃溢濠組過男團PlayTime的岑珈其,Jeffrey知道唱歌是岑珈其死穴,竟然叫他即場唱出道作品《說說》,岑珈其一聽完問題,立即說:「黐線,我食(勁辣口水雞)!多謝我親愛嘅Jeffrey俾咁大嘅氹我踩,咁樣整蠱我,我決定食!唔得呀,因為我對自己唱歌真係冇信心!」

岑珈其
Jeffrey特意拍短片叫岑珈其唱出道作品《說說》,岑珈其說:「黐線,我食(勁辣口水雞),因為我對自己唱歌真係冇信心!」
岑珈其
岑珈其說:「Edan缺點就係玩遊戲太奸,因為我睇過佢點樣出賣阿正。」

接着林柏希叫他逐個點評《膠戰》拍檔,岑珈其說:「Jeffrey缺點就係太靚仔,太令人羨慕!Edan缺點就係玩遊戲太奸,因為我睇過佢點樣出賣阿正,哈哈哈!阿正缺點就係太過mean,成日笑我矮笑我樣衰!Hillary缺點又係太靚囉,你知唔知佢玩遊戲好叻㗎!肥腸太過認真、太過誠實呀!」

之後岑珈其還公開說,曾經在片場聽過最刻薄的說話:「佢哋(導演)係咪都係小你乜乜屋企,然後就話你識唔識㗎,個位都唔啱嗰啲,其實又唔只一個,幾個都試過,因為真係燥起上嚟呀嘛!你話最刻薄試過一次係咩呢,我唔係唔想噏個人名,係因為我唔記得邊個。好細個嘅時候,我諗係拍電影,我唔記得邊一套,然後嗰個我唔記得係副導演定PA,總之就係鬧,『X,你以為自己邊個呀?真係以為自己做演員就係明星呀,收皮啦,又矮又樣衰』!」

岑珈其
岑珈其說曾經在片被鬧:「『X,你以為自己邊個呀?真係以為自己做演員就係明星呀,收皮啦,又矮又樣衰』!」

最後一題輕輕鬆鬆,林柏希問岑珈其,會否覺得自己和金馬獎「最佳男配角」袁富華撞樣?「其實我覺得係個氣場似,樣就唔係特別似!我認識嘅Ben哥(袁富華)都係有幽默感,佢個子又唔係特別高啦,又係幾鍾意講嘢,所以我覺得個氣場有啲似,同埋佢又係好鍾意好鍾意演戲!」說到底,岑珈其真的很喜歡演戲!