曾為谷婭溦《安守本份》及許廷鏗《Negative》作曲、有音樂才子之稱的陳天翱（Eagle），於2019年參加ViuTV王牌選秀節目《全民造星II》，憑精通鋼琴、結他等各種樂器的音樂造詣，成功突圍。Eagle 2021年宣布以獨立歌手身份出道，繼早前推出歌曲《Leave The World Behind》，相隔數月再推出第二首主打新歌《Our Last Day》，大玩獨特的電子音樂風格。

為宣傳新歌，Eagle日前到旺角街頭Busking，吸引大批粉絲圍觀；首次以歌手身份落區Busking的Eagle，表示過程中有點緊張，感激粉絲們在炎熱天氣下仍到場支持，Eagle表示：「最深刻天氣酷熱，唱到手都出晒汗，冇諗過咁熱的天氣下，fans都嚟支持，好開心有呢班fans，過程中我有啲緊張，但都嘗試多咗瞪開眼唱歌，以前我會闔埋眼，沉醉自己世界，唔敢望大家，今次瞪開眼望住大家多啲交流，見到大家都enjoy，自己都開心嘅。」

以王力宏為目標

Eagle計劃今年至少推出四首新歌，目標年底出版首張個人專輯，問到挾着音樂才子的名銜進軍娛樂圈可有壓力？Eagle直言壓力一定有：「作為獨立歌手，好多事都係自己做、獨立做，雖然我對音樂較為熟悉，但對整個巿場口味、歌曲質素等，自己較難把關，除咗音樂之外，自己對好多嘢都唔識，幕前又要面對好多人，始終呢方面我經驗尚淺。」

由幕後跳到幕前，Eagle坦言事前諮詢過不少人意見，當中包括音樂監製CMgroovy及許廷鏗，Eagle說：「我問許廷鏗點樣做適合自己嘅音樂，佢話做音樂係可以表達自己、感染到人哋，佢嘅意見啟發到我去做音樂。」作為獨立歌手，Eagle訂下目標希望可以像王力宏般成功，他說：「我好鍾意王力宏，佢好有才華、唱歌又好聽，我想做到好似佢咁，另外仲有 Ed Sheeran，佢細個聽Eminem嘅rap，不斷練習，最後解決咗口吃嘅問題，而家唱rap都得。」