熱話

網民推代食麥記服務 鏡粉可保喉嚨又拎到貼紙

麥當勞聯乘 MIRROR 三子姜濤 、 Anson Lo(盧瀚霆)和Edan(呂爵安)推出的全新廣告片和「世一貼紙」換領活動,又再激起一眾鏡粉食麥記熱潮。由於每位鏡仔均有3款貼紙,而每間分店只會提供其中一款換領,即是想儲齊某位鏡仔的貼紙,就需要去3間不同店舖喇。正當鏡粉擔心喉嚨不保時,今日就有網民推出代食服務,指「你要邊款貼紙同我講,你講我食,原價放卡無炒賣成分。」同時貼上本周Edan款式A貼紙實物相片,表示「$28包郵寄出」。不少鏡粉都讚網民有生意頭腦,而網民稱因為糧尾,希望可以互相幫助。有鏡粉留言詢問有沒有其他款式,網民隨即表示「明天幫你食」,又指明日可以幫最多6個人換購。同時亦有姜糖已經預約定兩星期後,希望網民可以幫他儲齊3款姜濤貼紙。