85歲謝賢早前憑《殺出個黃昏》勇奪金像獎最佳男主角，成為四料影帝，並由林家棟陪同上台攞獎，當四哥除下口罩時，卻被發現有嘴歪情況，令人擔心他中風。事後林家棟澄清，指四哥只是早前換牙，所以才會嘴歪。林家棟因為對四哥無微不至，被封為「#最暖男主角」，不過林家棟指在頒獎禮前謝霆鋒已叮囑他代為照顧四哥，又指自己身為後輩和監製，照顧四哥是理所當然。

日前四哥聯同《殺出個黃昏》演員林雪、鍾雪瑩等開祝捷會，身為監製和編劇的林家棟全程傍實，被問得獎感受時，四哥變回精靈，大騷幽默本色：「其實我係買獎！」家棟立即否認：「你唔好亂講，絕對冇！」問到原班人馬會否拍續集，四哥便說：「問佢（家棟）啦！」家棟秒回：「你唔好加價！」之後四哥還打蛇隨棍上說：「我一路跟住佢㗎喇！」可見兩人感情超好！