娛樂

大劉記者會 開腔回應都市傳聞 塞春卷、掟支票、助養女朋友⋯⋯

富商劉鑾雄(大劉)早前被拍得與舊愛呂麗君(現名呂姵霖)一同現身皇室堡,惹來外界揣測大劉與呂麗君復合,大劉早前就此向傳媒就此事發出澄清聲明,並於今(3日)召開記者會,除了交代與舊愛呂麗君的關係,更回應有關「助養」女朋友的事情及一些都市傳說!

大劉
大劉(左)與甘比(右)

大劉早前的聲明指,與呂麗君見面是因為對方有困難、有事相求,而為免小朋友受到影響的關係,二人最後達成商業協議,但並無任何財政照顧或支持。大劉今日在記者會上,拒絕透露呂麗君的困難,表示不方便評價對方,坦言「如果真係講,講七七四十九日都講唔完,大家就要喺度講到紮營。」

大劉早前被拍得與呂麗君一同現身皇室堡,惹來二人復合的傳聞。

大劉開腔回應都市傳聞

大劉在記者會上除了交代與舊愛呂麗君的關係、嚴正澄清兩人可能會復合的揣測外,又首次開腔回應多年來有關自己的都市傳聞:「我谷咗氣好耐,最緊要係澄清唔好畀人造謠造非。我好多氣谷谷埋埋,話塞春卷呀、乒乓波、網球呀,點樣鬧人呀,摑人兩巴人哋喊呀即刻攞張支票掟埋塊面度,我都隨身唔袋支票嘅。」

大劉表示過去很多事沒有解釋,只因傳聞太多,難以逐一澄清:「乜嘢都有人作,啲人唔抵得我搵到少少錢,多幾個女朋友,佢咪踩你囉。造謠造非,遲啲唔係話我塞人,係話我鍾意畀人塞添,都得㗎。」

春卷(示意圖)
春卷(示意圖)

提及過往女朋友

對於有傳大劉有「助養」女朋友,甚至現在仍很照顧這些前度︰「有啲真係有助養,但唔係全部,值得我支持我咪贊助,但唔代個個係。」又稱「我真係好直接唔怕講,我兩、三年前,滙咗一筆錢,係天文數字俾53年前嘅女朋友,你諗下佢幾老,因為值得我就會照顧。」

大劉又承認過往有不少女朋友,但只有1%是娛樂圈中人,指有一位前度「結婚兩三年,一年都同我攞幾個鱷魚皮、鑽石手袋」:又爆料娛樂圈有不少人「冇良心、賤到無論」:「以前有個女朋友,兩姊妹偽造假文字冒我簽名申請張入油卡,一個月入咗萬幾蚊,最後畀我嘅會計部發現,我都冇報警,我報警佢死梗!」