娛樂

大劉記者會 蕭若元拍片反擊:劉鑾雄已經冇新聞價值!

富商劉鑾雄(大劉)昨(3日)召開記者招待會,回應與舊愛呂麗君(現名呂姵霖)的關係,大劉於記招上暢所欲言,金句連連,除了解釋與呂麗君在皇室堡一同現身的原因外,又提及過去女朋友、關於自己的都市傳聞等。其中「燈神」蕭若元亦被點名,大劉認為對方的言論為造謠,對此蕭若元隨即拍片反擊,句句有骨!

大劉記者會 斥蕭若元造謠

事緣蕭若元早前在元旦上載影片,仔細分析大劉出聲明澄清與呂麗君無來住,是要平息甘比的妒忌心,片中又指大劉患有躁狂症等等。對此大劉昨日在記者會上表示,與蕭若元只在三十多前見過一次面,並不熟稔,不會要求對方收回言論,或採取法律行動,亦不會找台灣朋友「探吓佢」:「我好諒解蕭若元,佢搵到食使乜咁吖,如果我有一日要喺平台咁呃like呀,我就大乜X鑊啦!」

大劉又諷刺蕭若元因為欠債要避走台灣、兒子蕭定一又破產:「你有唔掂,我幫過咁多貧苦人家,唔怕幫埋你。」

「大劉」劉鑾雄 (左) 與甘比 (右)
蕭若元
蕭若元早前拍片分析大劉之聲明

蕭若元拍片反擊

大劉記者會後,蕭若元在YouTube頻道出片回應,蕭若元指對方貴人事忙,其實兩人不只見面一次,認識對方是在1986、87年左右,「有一次我同佢同時睇住政府救市嗰次,用一千億,另外仲有幾次睇住政府沽空救市頂大䲔,大家係坐喺度睇。」

談到被大劉指責造謠,蕭若元事先聲明:「我話佢有躁狂症,第一係網民講嘅嘢,唔係專業人士講嘅,我所謂嘅『躁狂症』係指一個人係咁發脾氣,脾氣好猛烈,不能自控,發得比較多。但如果醫生說他沒有這個病,我願意澄清這件事。」

蕭若元續說:「創傷後遺症就係引起躁狂,其實兩樣嘢係冇咩分別,表達自己有創傷後遺症有兩種方法,一係憂鬱,一係躁狂,有啲係又憂鬱又躁狂。」

“一般嚟講,劉鑾雄已經冇新聞價值!”

對於大劉暗示自己在網上平台「呃Like」,蕭若元展示網上數據,顯示與大劉相關的影片,以觀看次數來說只是排第20位:「我講個事實,講佢係唔會令view數增加,一般嚟講,劉鑾雄已經冇新聞價值!」

他指談論大劉跟談論肥媽的影片點擊率相差很遠,「我第一名條片都百幾萬(views),許志安條片都七、八十萬,許志安嘅新聞性都遠遠在劉生之上你,唔好以為有錢人就大晒。歷史上有錢人係冇咩社會地位!你覺得自己嘅重要性係overrated,李嘉誠都冇咩地位,何況係你?」

蕭若元展示YouTube數據

“我睇唔到你 (大劉) 生意上有咩傑出表現”

蕭若元又指影片內容包括Facts和意見,「Facts係可以查證,你可以隨時send e-mail嚟指證我錯咗,我一定更正。第二,如果係嚴重錯誤,我會道歉。關於劉生都係一樣,我講嘅嘢邊啲係錯嘅,你指正我。」蕭若元稱大劉可叫醫生寫信證明自己沒有躁狂症,若有證明的話,他會道歉。

至於意見,則是沒法作出客觀評定,屬外人的感覺。蕭若元坦言從不會主動談大劉,除非對方有大新聞︰「同李嘉誠、何鴻燊唔同,因為佢哋係列入商界十大梟雄,劉生唔喺入面。你(大劉)只係一個speculator (投機者),靠地產搵到好多錢,我睇唔到你生意上有咩傑出表現,反而冇你咁有錢嘅人都列入去,例如黎智英、王維基。」 

另外,對於大劉表示,不會考慮控告或找朋友到台灣「拜訪」他,蕭若元認為有三個解釋:「第一,佢真係唔會咁做;第二,我再講你就會咁做;第三,你話唔會咁做,但有人咁做就唔會入你數。大家覺得係咩?」