《演鬥聽》自播映以來，好評如潮！周六晚將會播映第三集，今次四位嘉賓都是唱得之人，譚嘉儀跳出框框，rock妹上身，何雁詩忽然變了何jazz，新人李妍佛系唱歌，而馬拉歌手龔柯允就大膽挑戰Bollywood style, 唱住歌都feel到她有陣咖喱味！

譚嘉儀興奮說：「我自己中學時都有夾band，但入咗行後好少唱啲rock嘅歌，今次係一個突破，可以喺《演鬥聽》試到我一直都好鍾意嘅pop rock，我覺得成個節目好多嘢玩，將啲歌曲改編成唔同風格，又要我哋自己創作啦！平時好少rap，今次都有機會rap幾句，雖然好緊張，不過可以將我哋自己嘅歌改編成唔同style去唱，我覺得超正㗎！」

何雁詩則表示：「我唔係特別叻唱jazz，只係鍾意聽，今次可以發揮吓！同平時嘅風格唔同，平時自己出歌會俾人produce晒，聽過十萬次先拎出嚟，今次係一個未出街前版本，好緊張！」

新人李妍就說：「因為時間唔係太多，今次音樂嘅準備元素都多，都驚會記唔到歌詞呀，個廠又凍，喉管又會收縮啦！好彩so far都ok！」

龔柯允亦說：「其實jam音樂係一件開心事，一有音樂，個人會跟住節奏郁，今次仲要咁多唔同嘅風格，雖然係好大嘅挑戰，不過都會嘗試去玩，喺〈我點你作〉嗰part，我就好搞笑㗎！首歌充滿馬來西亞風情，有華人、馬來人、印度人，好似咖哩嘅感覺好rich，同埋有印度唱腔，我自己都好鍾意模仿唔同種族嘅唱歌聲。」

對於四位嘉賓的表現，梓軒大讚：「好好，其實我哋個騷本身都係想搵番嘉賓最強嘅嘢，可能係音樂、可能係幽默感、可能係性格、可能係表演風格，今次好開心無論平時寫歌嘅朋友，或演繹上好高超嘅朋友，都可以玩得盡興，好似我哋邀請新人，大家未必好認識佢嘅面孔，但佢嘅聲音同創作都好好，李妍都好好，何雁詩、龔柯允同譚嘉儀大家已經認識，三個性格好唔同，何雁詩有深造jazz，我師傅阿熹話龔柯允係天上嚟嘅聲音，但係佢都可以好搞笑，斯文嘅譚嘉儀可以跳出框框，做到活力、反叛嘅表演。」