熱話

不滿抗生素須放入雪櫃 港媽鬧爆診所醫生姑娘冇常識

患病當然要看診,並依足醫生指示吃藥及休息。不過有些人對藥物認識不足,或者有自己一套想法,就像今次Facebook專頁「診所低能奇觀」分享的故事一樣。

版主在診所工作,憶述當日有位媽媽攜同女兒到診所看症,由登記到見醫生都非常順利,但在取藥時就遇到問題了。版主向該位媽媽解釋抗生素的食用方法:「一日淨係食一次嘅,要食足七日,記得要放入雪櫃。」話音未落,對方反應極大地問:「要放入雪櫃?」

版主解釋抗生素並非放進急凍格,只是放進保鮮格便可,怎料對方回應:「你要我個女食凍嘢?我個女嚟㗎,冇可能俾我個女食凍嘢囉!醫生講㗎?」版主再嘗試解釋,不過依然被對方插嘴:「有咩可能一個讀書多過我嘅醫生叫我個女食凍嘢呀?讀書讀壞咗個腦呀?、「一個醫生讀幾多書冇常識都係一個垃圾醫生囉!」。

之後該位媽媽再問版主:「你做姑娘你食唔食凍嘢呀?」版主點頭,對方就話:「原來我嚟咗間垃圾醫生垃圾姑娘垃圾診所,冇一個有常識㗎!」隨即帶著女兒急步離開診所。

網民異口同聲留言詢問對方有否付診金,笑言「個港媽自己個腦都被雪櫃雪凍左(咗)」、「將d(啲)抗生素放入微波爐解凍囉」、「想知佢係咪成世人無食過壽司同雪糕」。