藝人洪永城（Tony）和健身教練梁諾妍（Inez）於2018年承認拍拖，兩人今日宣布婚訊，洪永城在IG寫道：「由一齊跑步、到傾電話、睇日出、拍拖、不計劃的旅行、到扮攰逃避跑步、通宵睇動漫、同居、到我們至愛Coco離世、到開工連晚安早晨都沒有機會同你講、到今日一齊攜手踏上我倆的新旅程，好在有你，緊握我手，我希望一世都有你在身旁，追到你是我的僥倖，娶到你是我的福氣！」

梁諾妍亦在IG寫道：「下半生手拖手，繼續一起跑下去，繼續跑去世界每個角，感恩遇到你，常常帶給我歡樂，照顧我陪我通宵睇動漫睇網球比賽，工作上的互相扶持，願餘生我們也要一起笑住過，我們結婚啦！」恭喜！

梁諾妍透露洪永城的求婚過程很搞笑：「佢喺屋企個廁所度求婚，喺洗手盆度放咗啲微型燈泡，又有一束鮮花，鏡上又貼咗啲心型卡，仲寫上MARRY ME，最好笑係佢拎隻戒指出嚟求婚時候，我話我真係好急，結果佢要等我辦完大事再求婚，我就Say Yes！」