姜濤 紀錄片最後一集《答案 最終章》今晚播出，片段一開始就播出姜濤接受網紅加蔥訪問，姜濤指自己不喜歡姜B這個名，連姜濤這個名字都不喜歡，入行想改時已經太遲。之後就播出姜濤憑《Dear My Friend,》奪得「叱咤樂壇我最喜愛的歌曲」的片段。此時姜濤表白感受：「可能人哋睇我好高峰嘅位置，但其實我真係跌得好低，可能你睇嘅嘢係相反，可能你睇到嗰個人同嗰個人真心諗嘅嘢係完全相反，所以千萬唔好太容易去定義一個人，冇人能夠定義到！我入行一兩年可能仍然有比賽光環，但係漸漸到咗第三年，攞埋個獎之後，自己俾自己嘅感覺開始唔同，自己care嘅嘢多咗，每個人講一樣我唔好嘅嘢，我都會好執着，喺度諗一啲好無謂嘅嘢，跟住愈嚟愈唔開心。」

之後姜濤去咗商場，他很開心說：「好開心呀，我好耐冇嚟商場！我噚日特登睇咗條片，話點樣將自己嘅存在感降到最低，就係為咗今日做準備，只要有呢個手勢，就會有存在感低嘅訊號俾人知！關於今年第三隻歌嘅solo，新歌係希望用自己嘅故事同經歷作為背景，展現自己成年之後面對外界一切嘅聲音，從對抗逃避敢於反駁，到反省領悟！」之後姜濤返回母校青年學院（邱子文）懷緬一番，他在禮堂回憶說：「冇呀，嚟返呢間學校探番以前嘅人，呢度算係我第一次表演嘅舞台，嗰陣時同啲朋友，參加一啲表演同歌唱比賽，嗰時上呢個台好緊張，都唔知點解咁緊張！」

之後姜濤回到從前令他自卑的學校：「我所有嘅自卑、童年嘅唔自信，都係來自呢間學校，我唔係話呢間學校唔好，純粹係我喺呢度經歷嘅所有嘢，喺呢度愈自卑、愈唔懂事，大個先愈嚟愈變得懂事，我嗰陣太肥，每次學校有游水堂，我都會企喺泳池隔離，唔會除衫，嗰陣時每日跑步都會望住啲學生，跟住覺得好自卑，以前我就成日喺度射波（打籃球）！」

之後他解構新歌《鏡中鏡》：「開頭我做呢隻歌係想講我逃避同反抗，本身想反擊人，想啲人唔好再咁樣睇我，但諗諗吓又覺得冇乜嘢意義，我出完又點呢，要搵個方法令自己堅強啲，承認自己有呢啲唔好嘅聲音喺內心，諗方法同佢一齊行，其實個答案已經知係乜嘢，好似好多道理大家都知，但真正做到個道理要你做嘅事，都要經歷好長嘅時間，起碼我搵到個方向，知道邊條係啱嘅路，拍完呢個紀錄片，出完呢隻歌，都會有唔開心嘅時候，但起碼我知道有個方法，我希望大家聽完一次，你搵到自己嘅答案就唔使再聽，你聽多兩次，你搵唔到答案就繼續聽落去，咁就最好，哈哈哈！」

他又說：「其實每個作品幾乎都有自己嘅意見， 第一年自己話事權少啲，做藝人好神奇，因為你可以將自己內心嘅情境一步一步咁實現出嚟，有咁多人幫自己，只可以講好難得，自己可以再開放啲，因為我一直以來我冇乜講自己太多嘢俾大家聽，我只可以講喺呢個團隊入邊經歷嘅嘢，我唔會講太多自己過往嘅嘢。」之後場景去返商場：「依家好開心！大佬，行商場係一件幾奢侈嘅事，冇錯，呢個就係我想拍呢條片嘅原因，我點樣走出呢一排嘅低潮！ 」

但姜濤說不會忽略外界的聲音：「當我之後有低潮或者其他人有低潮嘅時候，睇吓呢條片，你會唔會唞吓先，會唔會返去你以前先，希望大家睇完之後俾啲意見，我覺得唔同嘅人睇完都有唔同嘅意見，雖然呢個MV係對抗內心嘅過程，但我唔會忽略外界嘅聲音，我會更加勇敢去接受外界嘅聲音，希望大家可以繼續督促我哋！」最後片段播出他說過的宏願作結：「今年好多人會覺得我喺度唔知自己講緊啲乜，但我喺呢個地方，我可以好有信心講，我哋一定會係亞洲第一！」