近期紅遍網絡的「試當真」成員蘇致豪、許賢及劉展翹（Jackie），為「黃Viu煲劇平台」《同煲同BLOW》任嘉賓，他們不再「走先喇，係咁先喇」，反而約定各位劇迷暢談煲劇秘聞，包括他們的二次創作原來深受煲劇文化影響，三位配音高手更即席為韓劇配上抵死對白，實行大騷Quali！

蘇致豪（蘇豪）、許賢與Jackie當年憑着玩二次創作配音片而為人熟悉，當中不乏惡搞劇集及動畫內容的短片，許賢與蘇豪自認是動畫迷，坦言為動畫配音比劇集更方便：「因為動畫天馬行空，做配音片時會彈性大啲，嘴形又會易配啲，相反劇集配音要配合返演員個嘴形逐粒音配，試過用咗足足一個星期去配一條短片，連行路聲、撳電話聲都要配埋。」

Jackie勁冧玉木宏

至於Jackie偏愛日劇，更視玉木宏為頭號男神，她說：「我真係好鍾意玉木宏，佢套《交響情人夢》我至少睇咗三次，好鍾意佢演一啲好王子狀態嘅角色，準備煲埋佢套《極道主夫》！」

主持人DJ麻利問到他們的創作靈感時，許賢竟化身小粉絲，自爆麻利是他的靈感來源：「我以前成日聽麻利嘅廣播劇 ，覺得把聲好好聽，所以讀大學時受麻利影響，成日創作廣播劇。其實配音片嘅底蘊都係廣播劇，只係多咗畫面，所以我好欣賞廣播劇帶來嘅靈感衝擊，因為每個聲音都要好準確地出現。」許賢又提到在煲劇時，會特別留意劇集的音效運用，又會幻想自己把劇集內容重新配音，增添不少創作靈感。

惡搞《衣袖紅鑲邊》

三位嘉賓又即席接受《同煲同BLOW》的配音挑戰，他們即場為黃Viu最新古裝韓劇《衣袖紅鑲邊》重新配音。向來搞鬼的蘇豪繼續發揮幽默本領，以逗趣聲線反串女主角李世榮，引得全場大笑！最後蘇豪笑言這把「謎之女聲」是偶然間發現：「我記得呢把怪聲係同許賢喺一個同學屋企發現，嗰時我發緊脾氣，但又想禮貌地發脾氣，唔想用真聲同對方溝通，最後就發現自己有呢把聲出現。」

《同煲同BLOW》是「黃Viu煲劇平台」推出的節目，第三集邀請到有「港版木村」之稱的歌手洪嘉豪（Kaho）與主持人麻利，齊齊討論日劇話題，當然不得不提「日劇天王」木村拓哉的多部大熱神作，Kaho更即席「神還原」木村在《悠長假期》玩彈彈波的經典埸面，讓一眾劇迷的回憶立刻湧現！

木村拓哉的《悠長假期》、《律政英雄》、《戀愛世紀》等多部劇集，曾在日本平成時代創下不少收視神話，同時亦曾在香港捲起一陣木村熱潮！近年被指與這位日本男神「撞樣」的 Kaho 原來也是木村迷，更透露是受媽媽胎教影響：「我媽咪係木村迷，陀住我嗰時成日睇木村嘅劇，我覺得有少少胎教影響，有科學根據講過DNA係識得學習，所以似樣都可能係有啲關係。」

撞樣木村 胎教有關？

對於被褒獎為「港版木村」，Kaho坦言自覺受不起這個稱號，但另一邊廂又會心裡暗爽：「木村喎，真係受唔起！坦白講，有時自己都覺得係有少少相似，但我唔會認㗎嘛，不過係好開心啦，佢咁靚仔。」近期Kaho再有新花名，由日本男神變身為大埔許願樹「林村拓哉」，他說：「事緣係有人睇完我MV，就喺討論區留言話我好似木村，但佢就打錯字做『林村』，有人回覆佢林村喺大埔喎，之後就有粉絲改圖，將我Key到成頭都係寶牒。」

木村在《悠長假期》為了冧掂山口智子，曾在三樓窗邊玩彈彈波展示技術，《同煲同BLOW》安排Kaho重現這幕經典場口。他站在閣樓模仿木村拋波前的小動作，對著麻利唸出日文對白，相當入戲。最後Kaho竟然一擊即中，只需一Take就成功接實彈彈波，非常厲害，連麻利都大呼驚訝！除了木村的劇集外，在「黃Viu」亦可以追看其他經典日劇，如《同一屋簷下》、《101次求婚》及《沙灘小子》等，當然還有最新上架的日劇《X光室的奇蹟 2～放射科的診斷報告～》、《真犯人旗標 》及《SUPER RICH》。