本地男團MIRROR成員 呂爵安 （Edan）和盧瀚霆（Anson Lo）近日到日本拍攝由袁劍偉執導的電影《盜月者》，雖然二人有工作在身，但每日仍不忘在Instgram上傳Story和帖文分享當地生活向粉絲報到。

昨晚（3月20日）Edan在Instagram發布一則與Anson Lo在便利店跟日版《大叔的愛》飾演大叔黑澤武藏的吉田鋼太郎廣告合照，並寫到：「睇下我哋喺日本見到邊個！係原版嘅大叔！田一雄X黑澤武藏X凌少牧 世紀合照。」又Tag同樣在港版《大叔的愛》飾演大叔KK的黃德斌：「KK唔好呷醋。」面對突如其來的「世紀合照」，不少粉絲都立即留言引用劇集主題曲《突如其來的心跳感覺》歌詞：「未預計這一秒會這麼震撼我」，又指「好多回憶啊！」、「田田同牧牧一定會幸福生活落去」。

雖然這邊廂勾起田牧CP粉絲回憶，但那邊廂就有人留言批Edan行為：「得閒就學下戲練下歌，唔好浪費時間喺度炒CP啦，次次炒登神神教同爵group都嘈，你自己group MMA冇所謂，唔好影響人哋先得㗎。」而Edan就對此看法親自作出回應：「得閒就睇下書同屋企人朋友傾下計，唔好浪費時間喺度話人炒CP啦，次次我po同佢嘅嘢都話炒CP，我係咪唔同得我朋友合照啊，你同你朋友去旅行會唔會po相啊。你自己諗多冇所謂，唔好意思扭曲我做嘅嘢同控制我po乜先得㗎。」

隨後兩人再來一輪唇槍舌劍，網民問：「說中了？」Edan就回覆：「回應你就係說中了？咁你玩晒㗎喎。」網民就表示：「講真真係好榮幸爵安親自回覆我，咁我就講多少少自己感受。」之後帶出二人cp問題經常令粉絲之間吵架和爭寵，令到很多人不開心。最後補上：「如果我講嘅語氣冇禮貌咗我可以道歉，但希望你明白我想表達乜嘢。」

Edan再度回覆：「咁嘅語氣咪大家都舒服啲囉，絕對歡迎你道歉。咁順便我都想問多少少，你係咪認為你所講嘅OverFF、爭寵、嘈交全部都係我嘅責任？如果係，你覺得我應該點樣做去解決呢？」

該位網民直指：「好想同你討論cp問題，欣賞你直接面對冇迴避！」再以「百字文」吐出心聲，表示部分粉絲會幻想Edan和Anson Lo真拍拖，又會到工作人員或前度IG留言騷擾，行為令人討厭；明白公司為商業考慮想塑造二人有情侶感，但就因為他們小小互動會換來各批粉絲（意指爵屎、神徒和登神粉）吵架。

之後Edan未有回覆，事件暫時告一段落。對於Edan和網民互相說理，粉絲大讚Edan有型勇敢，再指：「po咩都係你嘅自由，繼續enjoy同做自己。」、「個IG係你嘅，鍾意點就點啦，又不傷害別人。」、「請你同Anson Lo都要知道，不要因為啲唔合理嘅人而影響邏輯道理同自己。」

谷德昭主持的ViuTV節目《爆谷一周》昨晚首播，首集就請來吳君如、MIRROR成員Edan（呂爵安）和新晉導演鄭晉軒大談拍賀歲片《闔家辣》的趣事。吳君如大爆為何看中Edan：「當時佢哋（MIRROR）已經好紅，我同花姐講，叫佢哋嚟試鏡得唔得㗎？好多人好怕casting，怕瘀嘛！明知有casting你唔揀我，咁咪好失落囉，花姐就話：『得，咩唔得呀！』Edan就嚟咗casting。當時我哋試鏡見咗唔少人，但未搵到一個中，見到Edan係佢喇！試鏡當日我唔喺度，但係睇返片，覺得Edan做得好自然。」

Edan說：「當時拍完《大叔的愛》都未上，從來冇拍過電影，得知有電影試鏡機會，無論咩角色都好想試，於是膽粗粗行去試鏡，我覺得係個經驗，冇諗過得唔得！」吳君如指有人讚她選擇Edan有先見之明：「拍緊嘅時候，《大叔的愛》上緊，最搞笑係啲人就話：『嘩，君如，你真係有先見之明，趁低吸納，低價入市，其實港產片嚟，都唔係好低價，但真係好幫手！」

谷德昭問Edan和這麼多好戲之人拍戲，有甚麼感覺？ Edan說：「其實真係好幸運，當初casting嘅時候，我唔知道演員陣容咁勁，我好記得花姐喺架車度同我講：『你知唔知你套戲有邊個呀？佢同我講有君如、中基同Gigi（梁詠琪），我好驚訝！我真係覺得好好彩，但同時都擔心，好大壓力，因為自己戲份都唔輕，再加上同咁多前輩一齊演，好驚自己會唔會演得唔好，但佢哋每一位都好錫我！」

谷德昭大爆Edan第一次拍電影就有鴛鴦浴戲份，問他有甚麼保護措施， Edan說：「我有着褲嘅，有操肌肉嘅，都有做掌上壓！」又指：「坦白講有啲尷尬同緊張，始終第一次，講到耳仔都紅埋！我係演員，故事背景講我哋一齊咗好耐，做呢件事係好平常，但因為未試過，所以好驚！」君如問今次是否銀幕初吻？Edan說：「我嘅銀幕初吻係男仔嚟嘅！」現場觀眾即爆笑拍掌，導演便說：「都係鴛鴦浴，企缸嚟嘅！」 Edan接着說：「係《大叔的愛》Anson Lo，今次呢個係銀幕異性初吻，我同浴缸好有緣份！」吳君如就搞笑話：「咁代表咩呢？代表Edan真係好『直』，係一個『直』人，佢同一個男人冇乜事，但同女演員就尷尬，即係代表……你明啦！」Edan即刻爆笑說：「明！」

之後，谷德昭透露Edan戲中對白「粉絲好食」爆笑又自然，令Edan非常驚訝：「冇諗過導演會剪落去！」 Edan透露：「呢句對白唔係我諗嘅，係撞出嚟！」又說：「粉絲真係係好食，我係好鍾意食粉絲嘅！」說完自己都忍不住笑！吳君如補充：「好笑嘅，因為我哋戲裏面有個演員係食齋，我哋成日大魚大肉，我成日萬歲，佢啲Fans又成日攞嘢食嚟，但嗰位演員就偏偏成日叫人買粉絲食，我每日見到佢都係食米粉同粉絲，我話『你又食粉絲』，Edan就話：『粉絲好食呀！』跟住佢突然間講『死喇，講漏咗嘴，咁敏感，唔講喇』。」君如覺得這一句很好笑，所以加入電影之中，而飾演Edan媽媽的梁詠琪是素食者，難道說她？

Anson Lo（盧瀚霆）、Edan（呂爵安）登神CP自《大叔的愛》後爆紅，廣告不斷。事隔3個月，Edan昨晚在IG寫了1800字的長文講感受，他除了多謝《大叔》劇組，又多謝黃德斌和Anson Lo：「多謝德斌咁照顧我，同我分享好多經驗，教我好多嘢，就好似個爸爸咁，超溫暖！Anson Lo就唔多講啦，好慶幸可以同你一齊參演呢套劇，希望未來我哋都可以繼續一齊進步一齊support住大家！」Anson Lo就留言回覆：「叻仔～ keep going together！」很有愛！

而Anson Lo繼7月時獲神徒斥資租下尖沙咀碼頭巨型廣告位慶生後，不斷有廣告商接力，令那裏變成教主碼頭，今日還換上MIRROR 12子的手機廣告，神徒和鏡粉又可以打卡了！最搞笑是有鏡粉見Netflix原創韓劇《魷魚遊戲》大熱，搞笑將MIRROR成員key落《魷魚遊戲》的劇照中，還將經理人花姐變成「一二三木頭人」的公仔，而Anson Lo和Edan都在當眼位置，教主就變身男主角李政宰（456號），足見兩人相當受歡迎！