為紀念「哥哥」張國榮離世20周年，哥哥生前經理人及陳淑芬主辦的《繼續寵愛．二十年．音樂會》將於4月1日晚上8時15分於紅館舉行。由於反應熱烈，門票於2月底開售後已極速售罄，主辦方有見及此，決定於網上舉行實時直播，讓未能入場以及海外的「哥」迷可以於網上一同懷緬哥哥。
網上直播門票現已於https://www.mifashow.com/zh-hk/開賣，票價188港元。除了香港之外，日本、英國、美國、紐西蘭、澳洲東部均能實時觀看。陳淑芬表示過往「哥」迷會訂購花籃悼念哥哥，由於紅館後台以及通道空間有限，所以她呼籲「哥」迷帶同一支紅或白玫瑰，於參與音樂會當晚6時至7時15分在紅館外露天廣場的悼念儀式獻花。
是次音樂會扣除所有開支後，將捐予慈善機構《好聲》，支持《哥迷芬享友營飯》項目，幫助香港基層家庭渡過難關，鼓勵他們重新出發，藉此一同延續「哥哥」真、善、美的精神。
再過幾日便踏入新一年，政府日前宣布取消各項社交距離措拖，活動場地亦不再有人數上限，一連串大型活動都將如火如荼地舉行！其中多位人氣歌手及組合都會在2023年舉行演唱會，樂迷們有排忙！睇住時間撲飛吧！
陳奕迅 （Eason）《Fear and dreams演唱會》上星期開賣，58,000張飛唔使一日賣晒，售票網塞車13小時，創下塞網最長紀錄！上次買不到飛的朋友不用失望，Eason今日宣布加開四場，包括 1月2、3日和6、7日，門票將於10月13日公開發售！今次依舊有近五成、約14000張門票放出街賣，座位表沒有變，紅館仍然只可坐八成半人，但就跟政府一樣再開放防疫距離，之前個18 場，每六個人要隔一隔，今次可以12人坐埋一行，熱鬧一啲。至於十年未見絕世台中間，最前正面靚位，4場都有。Eason加四場這麼限量，有樂迷笑他孤寒，留言: 「加多少少啦陳生！」
鄭伊健 近日宣布將於11月21日至24日、26日至27日，在紅館舉行 6場「HERE and NOW 2022 鄭伊健演唱會」，和粉絲再見面！身形fit爆的伊健接受訪問時表示，今次個唱大玩「流動電影」構思，有歌有表演，相當特別！問他是否經常話老婆蒙嘉慧肥，他笑着否認：「冇，冇，佢強壯咗啫！」相當鬼馬！大會還為本月4號生日的伊健預備蛋糕提早慶生，他坦言：「原來當你好耐冇做呢樣嘢，你會覺得好驚喜！」
MIRROR 紅館演唱會事故至今已一個多月，So Ching（蘇芷晴）男友阿Mo（李啟言），仍在伊利沙伯醫院留醫，情況由嚴重轉為穩定，現時已轉往神經外科病房。而另一傷者張梓峯早已出院，但仍需接受長時間治療，KOL「呂校長」早前透露其病情變差，情況令人關注。
主辦單位MakerVille及大國文化在意外後，將第5場至第12場演唱會取消，上月公布退票安排，觀眾可以在本月15日至明年9月14日申請退款，亦可保留門票兌換日後舉辦的指定MIRROR演唱會，還表明將不遲於2023年9月14日公布新演唱會詳情，很多鏡粉都表示會保留門票，等12子再開騷。
今日有報道指，MakerVille最近已經入紙申請再搞紅館騷，時間定於下年7月，和今年演唱會檔期相若，但未知何時確定申請成功。不過Makerville回覆傳媒時指報道並不真確，而MIRROR經理人花姐（黃慧君）暫未有回覆。
周國賢 （Endy）一連三場紅館演唱會《周國賢 Endy Chow jaugwokyin THE END 演唱會2022》昨晚頭場，演唱會開場出現多個Endy ，像真道極高，觀眾一開始已經high站立，全場開着手機燈伴唱，Endy唱《赤城千葉》時着和服look出現，全場起哄。
其間Endy猛說不好意思，眼有淚光，感慨十八年先上到紅館：「唔好意思，隔咗咁多年，對唔住。點解我要搞咗18年先上到紅館？我都唔知，我知就可能一早上到嚟。」現場觀眾為Endy打氣，他哽咽落淚說：「我幻想咗呢個舞台好多年，原因係咁嘅，上到嚟真係會空白。」又說：「18年入面有好多唔同團隊，有啲已經失散咗喺道路上、有啲朋友已喺彼岸先見到，我想同每一個成長路上嘅人講，縱使短時間入面冇辦法再見，我都好感恩，我長大喇！」
之後Endy講起以前讀art 時別人用畫筆，他因支筆爛了改用手被同學投訴，幸好他遇到良師覺得效果好，反而叫全班同學一起嘗試，令他明白大家應互相尊重。昨晚他請請來ToNick任嘉賓合唱《時空》，臨走Endy忍不住和恆仔咀嘴，答謝支持，令恆仔嚇一嚇，相當搞笑！
Endy encore時提到近日有位共事7年的司機離世，他哭着說：「佢對我好好，好似我家姐一樣，我同呢個地方一而再咁擦身而過，早幾個月之前佢仲話終於可以車我上紅館，你做到喇，我哋會再見，this is not the end！」接着唱《身後身》及《塵世美》完場。
MIRROR 於7月至8月舉行12場紅館演唱會，不過門票一票難求，就算以實名制在城市售票網公開發售，很多鏡粉苦等近10小時都入不到網站，可謂身心疲累！去年7月由「前夫」建立的「我老婆嫁左比Mirror導致婚姻破裂關注組」，至今有逾35.6萬成員，其發起人兼管理員RC昨晚（2日）在群組發聲明表示，因為對今次 MIRROR演唱會之安排感到極度不滿，決定將會於MIRROR演唱會後，永久關閉此關注組。
RC寫道：「我對今次Mirror演唱會嘅安排感到極度不滿，為此，我宣布將會於Mirror演唱會後永久關閉『我老婆嫁左比Mirror導致婚姻破裂關注組』。感謝各位喺呢一年時間嘅關注及支持，同埋我兩位有咩事都撐我嘅Admin。Mirror賣廣告，鏡粉衝住買哂佢，有Mirror卡抽，鏡粉一日三餐食老麥，Mirror出席活動，鏡粉早一日去排隊霸位，Mirror出新MV，鏡粉人肉loop到幾百萬view唔知為乜，Mirror出新歌，唔使你俾錢宣傳，佢哋自己出錢出力搞應援。好喇，首個紅館演唱會，難買飛就預咗啦，咁多人想睇，一睇個floor plan，喂黑洞咁嘅樣嘅？俾我嘅感覺係：你眠乾睡濕養大個仔，想參加佢嘅畢業典禮，但，你要睇下好唔好彩先買到飛！」
RC又話：「一係你就幫襯校長個fd買份保險，一係就係canteen買24個月餐券，想坐靚位？買兩set吖！你哋而加係將鏡粉對Mirror嘅愛綁架，你當鏡粉係ATM係水魚，錢係要賺，但食相唔係咁難睇掛！各位演唱會嘅主辦單位，你哋係咪真係以為啲鏡粉個個都幾億身家？我哋成日鬧黃牛，你哋就自己做大黃牛，唔使驚，今次實有人睇㗎，下次？唔知嚕！買唔到飛我無乜所謂，反正又唔係我睇，如果你唔知我嬲乜，你試下將上面『鏡粉』呢兩個字換做我老婆/我老母/我個女，咁可能會投入啲！」
很多網民看完留言支持：「 講得好好……支持你關站！」、「版主講出好多粉絲心聲……真係好嬲好嬲！」、「真係7部機 11個鐘都load唔到入去，廁所都唔敢去，但都買唔到：上兩次信用卡又係咁，今次實名又係咁 。 魯生，你真無（係）使好多人傷了心！」、「版主真係要有骨氣，唔好俾公關收買到，今次真係要為所有鏡粉討公道！」、「申請MOX，為演唱會，最後等咗四個鐘，乜都冇。俾錢做Miro會員，得個吉。實名制公售，坐喺電腦面前10個鐘，買唔到，而家仲要我HKT 課唔知幾多金…我真係覺得好攰，過埋今次紅館，真係想放棄！」、「我都好唔捨得個group ，不過我尊重版主嘅決定同感謝所有係到分享故事嘅各位。」不過亦有網民說：「我明白你心聲，但你連個谷都執埋，以後大家有冤冇路訴喎，你又冇咗開谷嘅初心，何必呢？」
